РЕАЛ БЎЛГАН ВОҚЕА

(АЯНЧЛИ ҚИСМАТЛАР ҲИКОЯСИ)
Мен қамалиб чиққанман. Тўрт йил саккиз ой қилган жиноятим учун жазо ўтадим. Қамоқ ҳаёти ўзгача. Лекин шундай файзсиз даргоҳда ҳам оташин қалбларни кўрдим. Биз ўша йигит билан қалин дўст бўлиб қолгандик. У узоқ муддатга қамалганди. Билишимча машинада бир «каттакон»ни туртиб юборган. У уйланганига бир йил ҳам тўлмай туриб қамалганди. Иккимиз деярли бир вақтда қамоқхонага келганмиз. У қамалганида хотини оғироёқ экан. Ота бўлганини эшитганида у билан битта камерада эдик. Ўта самимий, оқкўнгил йигит эди у. Уни хотинининг
суратига қараб ҳаёл суриб ўтирганини кўп марта кўрардим. Ҳа, у рафиқасини жудаям севарди...
16 июнь. Унинг учун алоҳида муҳим сана эди бу. Хотинининг туғилган куни. Хотини 4 йил давомида ҳар сафар шу кунда уни кўришга келарди. Бошқа кунлар у рафиқасига қамоқхонага келишга рухсат бермасди. Эҳтимол сиқилишини истамагандир. Унинг ўзи ҳам шу сананинг келишини бир йил кутиб яшарди. Тўрт девор орасида кутиш қандай азоб эканлигини фақат бошдан ўтказганлар билади. Лекин у сира дардини билдирмасди. 16 июнни кутаётганини билардим холос. Сўнгги йил хотини келганида у жуда хафа ҳолатда кириб келди. Икки кун умуман туз тотмади. Кейин билишимча хотини қандли диабетнинг оғир турига чалинибди. Докторлар шол бўлиб қолиши мумкин дейишибди. Нега уларнинг бошига бунақа оғир кунлар ёзилганини ўшанда ҳам тушунмасдим, ҳозир ҳам бу ҳақда ўйлаб ўйимга етолмайман. Қани эди уларни бахтли кўриш насиб этганида. Кўз ўнгимда у тобора сўлиб борарди. Кейинги ойлар ичида хотинидан келган ҳар бир хат уни бир йилга қаритарди гўё. Унинг кўзларида умидсизлик учқун лаган эди ўша кезларда.
Кетишим маълум бўлгач у билан қучоқлашиб хайрлашдим. Укамдек бўлиб қолган йигитга бардам бўлишини, ҳаммаси яхши бўлишини тушунтирдим. Чиқиб унинг оиласидан хабар олдим. Унинг саломини оиласига етказдим. Уларга Аллоҳдан бардош тиладим. Кейин ўз шаҳримга кетдим. Орадан 3 - 4 ой ўтди. Тонгги газеталарнинг бирини ўқирканман қамоқхона ҳақидаги бир мақолага кўзим тушди. Унда қамоқхонадан касалхонада оғир ётган хотинини кўриш учун қочмоқчи бўлган бир махбуснинг отиб ташланганиги ҳақида ёзилганди. Юрагим жизиллаб, газета санасига қарадим:
16- июнь...