Предыдущая публикация
Մռայլ գիշերն է լռում,
Խավար գիշերն ամենուր,
Ես վառել եմ խավարում
Իմ ճրագը ոսկեհուր...
Ստվերները ծածանուտ
Կերերան ու կհանգչեն,
Կզգամ քայլը քո ծանոթ,
Քո խոսքերը կհնչեն։
Դու հանկարծ կհայտնվես,
Անակնկալ դու կգաս,
Քաղցր սուտով կխաբես,
Կսիրես ու կգթաս։
Եվ մենության այս միգում,
Ու խավարում այս մեռած
Սեր կվառես իմ հոգում,
Ազատությո՜ւն ու երա՜զ...
Մեղմաքայլ կհեռանաս,
Ես կմնամ միայնակ,
Նորի՛ց, նորի՛ց կդառնաս՝
Խորհրդավոր ու հստակ։
Մութ գիշերում կնստեմ՝
Լցված սիրով խնդագին,
Քո գաղտնիքը ես գիտեմ,
Բայց չեմ ասի ոչ ոքին....
Մռայլ գիշերն է լռում,
Խավար գիշերն ամենուր,
Ես վառել եմ խավարում
Իմ ճրագը ոսկեհուր...
Следующая публикация
Комментарии 1