Предыдущая публикация
⭕БИСМИЛЛАХИРОХМАА НИРОХИИМ.
🔶🔶🔶🔶🔶🔶🔶🔶🔶🔶🔶🔶🔶🔶🔶
Алыска каттайм, таксистмин, 160-180ден кем айдабайм. Кырсык болсо баарына жооп беремби? Дин жолунда кандай? 077911...
-Белгиленген эрежеге карабай айдаган болсоңуз атайылап кырсыкка учураткан катары жооп бересиз.
-100 000 сомдон канча зекет берилет?
-2,5 пайызы берилет.
- Талак деп айтпастан жини менен “башың бош” десе кандай болот? 077018...
-“Башың бош” деп чындап ажырашуу ниетинде айтса түшөт.
-Биринчи баламды операция аркылуу төрөгөм, 9 ай болду. Дагы боюмда болуп калды. Врач “ден соолугуңа зыян, алдырып сал, курсагың көтөрө албайт” деди. Эмне кылсам болот? 077123...
-“Ден соолугуңа олуттуу зыян болот” деп врач айтса алдыруу керек. Бирок, бардык врачтардын пикири ушундайбы же бир эле врачтынбы? Үчтөн кем эмес врачтардан сурап көрүү керек. Баары ушундай пикирди карманса уруксат берилет.
-Жаңы жылда салют атса болбойбу? Тамакты столго эмес, жерге дасторкон жайып ичиш керекпи? Элмира
-Жерге отуруп тамак ичүү шарт эмес, ыңгайына жараша боло берет. Бирок, жерге отуруу адамдын кичи пейилдигин туюнтат.
Эмне үчүн салют атышат? Ойлонуш керек да, жөндөн жөн эле акчаны ысырап кыла бербей. Бул жерде акчаларды чыгарып айрып-айрып эле ыргыткандай сөз болуп атат.
-Менин күйөөм 4 айга дааватка чыгам деп болбой жатат. Базарда соода кылабыз, карызыбыз бар. Барбаса болбойбу? +79529....
-Карызы жок болсо, ата-энеси, үй-бүлөсү ыраазы болсо, анан дааватка барсын. Алгач карыздан кутулууга аракет кылсын.
-Бир дүкөндөгү рекламада мындай жазылган: “Зачем мне рай, если там нет шоколада”. Мындайга кандай карайсыз? Кыргызстан мусулман мамлекети эмеспи? Же баары боло береби? Четтен келгендер “кыргыздар Кудайды да унуткан го” деп айтпайбы? 055625...
-Кыргызстанда мусулмандар көп жашагандыгы үчүн мусулман өлкөсү катары тааныйбыз. Бирок, шарият канчалык деңгээлде жүргүзүлүп жаткандыгы башка маселе. Биз бирөөгө барып тыюу сала албайбыз, укугубуз жок. Болгону осуятыбызды айтабыз. Ал адамга сиз да барып “Кудайдан коркуңуз, мындай жазууң туура эмес” деп айтсаңыз болот.
-Мен 40 жаштамын. Жүрөгүмдү өйүткөн нерсе- сырткы келбетим, жыныс мүчөм эркектикиндей, бирок жан дүйнөм, оюм, баскан-турганым, сүйлөгөнүм, айтор баары кыздардыкындай. Кыйналып кеттим. Кеңеш бериңизчи. 077960...
-Жыныс мүчөңүз эркектикиндей болсо эркек болуп эсептелесиз. Врачтар менен кеңешип, эркектин гормонун көбөйтө турган дарыларды алып ичиңиз. Өзүңүздү эркек катары көрүңүз. Кээ бир адамдар өзүнөн өзү эле психологиялык жактан жабыркап жүрүп акырында жаман жакка келип калат. Шарияттын жолунда жүргөн болсоңуз иншаллах баары жакшы болот.
-Менин дос кызым намаз окуйт. Анан тамеки да тартат. Тамекини таштай албайм дейт. Ал кылганы күнөөбү? 055232...
-Тамеки тартуу макүрү (арамга жакын). Адамдын ден соолугуна, экономикалык абалына зыян жеткирет. Тегерегиндеги адамдарга да зыян. Намаз окуп алып тамеки тарткандарга таң кала берем. Намаз адамды жаман иштерден кайтаруусу керек. Анын намазы кандай болду? Анда намазды кайрадан карап чыгуу керек, кантип окуп жатат?
-Ыймандуу балага турмушка чыккым келет. Өзүм 5 убак намаз окуйм. Тилегиме жетиш үчүн кандай дуба кылсам болот? 055232...
-Намаздан кийин Кудайдан сураныңыз “Оо Кудай, мага төп келген, ыймандуу баланы насип эт” деп.
-Мен намаз окуган баланы жакшы көрчүмүн, ал да мени. Бирок урушуп кеттик. Аны менен турмуш кургум келет. Кантип анын көңүлүн алсам болот?
-Анын көңүлүн алуу үчүн күйөөгө тие турган убагыңыз келгенде бирөөнү жөнөтүп “мени алсын” деп айттырыңыз. Көңүлүн алам деп индияча бийлеп, оозу-мурдун боёп алып ары-бери баскан туура эмес. Жакшы жүргөнгө аракет кылыңыз, анан Кудайдан суранып дуба кылыңыз. Кудай баарын өз жолуна коёт.
-Атамдын жаман жолдо жүргөнүн билем. Көргөн сайын жиним келет, апамды аяйм. Кээде атама катуу сүйлөп жиберем. Кайра өкүнөм, бирок, кечирим сурабайм. Бул күнөөбү?
-Күнөө. Ата-энеңиз каапыр болгон күндө да жакшы мамиле кылууңуз керек. “Аргымакты жаман деп бууданды кайдан табасың, агайыңды жаман деп тууганды кайдан табасың”. Атаңызды жаман деп жээрисеңиз бирөө менин атам жакшы деп сизге берип койбойт. Урматташыңыз керек. Жараткандан суранып дуба кылышыңыз керек, “атама түз жолду көрсөт” деп.
-Намаз окуйм. Бирок, дайыма көңүлүм чөгүңкү. Тез жиним келет, жаман ойлойм. Көңүлдү тынчыткан, мээримдүү кылган дубалар болсо айтыңызчы. 077879...
-“Фатиха” сүрөсүн окуп өзүңүзгө дем салыңыз. Пайгамбарыбыздын, сахабаларынын тарыхын, диний китептерди окусаңыз иншаллах жакшы болот. Дайыма “бисмилла” деп жүрүңүз.
-Намазды кыргызча окуса болобу же болбосо эмнеге? 070027...
-Намаз араб тилинде окулат. Араб тили бардык мусулмандардын башын бириктирип турган тил. Бул бардык мусулмандарды арабдаштырып жиберүү деген сөз эмес. Болгону биздин эрежебиз, жазылган мыйзамдарыбыз, Куран китеби түп нускада болуусу керек. Баарыбыз түп нускасын окуганда гана биримдигибиз сакталат.
-Бей деген сөз эмнени билдирет? Көп ырларда ушул сөз колдонулат экен. Талант
-Бей деген түрк тилиндеги мырза деген сөз.
-Атам 1990-жылы каза болгон. Ошондо мурасты шарият жолу менен бөлөбүз деп молдо таппай койгонбуз. Азыр ошондой илимди билген молдо барбы? Насыр
-Мага келгиле.
-1950-жылы Курбан айт качан болгон экенин билесизби? 077872...
-Жакын күндөрдө муфтияттан Хиджра календарын чыгарабыз. 1950-жыл кайсы Хиджра жылына туура келгендигин аныктап, анан эсептеп чыкса болот. Бул өтө деле оор эмес, болгону бир аз убакыт керек.
-Жолдошумдун экинчи аялы бар. Барып келип “сен жамансың, шалаакысың” деп урушат. Ал жалгыз бой келин, менин үч балам бар. “Үйгө келсем башым ооруйт, сени көрсөм ургум келет” дейт. Үй-бүлөм бузулбашы үчүн эмне кылышым керек? 077880...
-Үй-бүлө бузулбашы үчүн жакшы кийинип, жасанып жүрүңүз. Атырларды себиниңиз. Үйдү таза кармаңыз. Келгенде тиги аялынан келди деп элестетип алып жиниңиз келбестен күйөөңүздүн көңүлүн көтөргөнгө аракет кылыңыз. Ал жакшы көргөн тамактарды жасаңыз. “Тиги менен жатып келдиң, мени менен жатпа” дебестен эркелетиңиз, нары карап уктап калбастан. Балдарыңызды жакшы караңыз. Кээде балдардын иштерин күйөөңүзгө жүктөп коюңуз. Мисалы, “баланы көтөрө тур, баланы бакчага жеткирип кел” деп. Анан намаз окуп, Кудайдан суранып дуба кылыңыз. Кээ бирлер балалуу болсо эле жүдөп кетет. Ашканадагыдай эле жүрө беришет, манты жыттанып. Андай болбойт. Бой-келбетине карап, таза жүрүш керек.
-Таштанды төгүп жатсам жанында эки бомж турган. Аларга көңүл бурбай эле бара жатсам сүйлөнүп, жаман сөз менен сөгүп кирди. Ал жакты карасам “менин кейпимди кийип кал, оомийн” деп тескери батасын берди. Жаман акыбалда калдым. Эмне кылышым керек? 077819...
-Эч нерсе кылбайсыз. “Ит үрө берет, кербен жүрө берет”. Туура жолдо жүргөн болсоңуз, намаз окусаңыз алардын каргышы тийбейт. Айта берет.
-Медресеге баргым келет. Бирок ата-энем уруксат бербей жатат. Кайсы дубаны окусам болот? Нурзада
-Эң жакшысы, эки рекет нафил намаз окуп “Оо Кудай, ата-энеме ынсап бер, медресе окуганым менин дүйнөмө, акыретиме, диниме пайдасы тие турган болсо окута көр” деп жалбарыңыз.
-Байыркы кабырстанда зер буюмдар бар экен. Кандай жол менен алсак болот? Сурайлы десек ээси белгисиз. 077873...
-Ушул маселени мурда да сурашкан эле. Жообун таба элекмин. Тапканда айтайын.
-Биздин үйдө күндө уруш. Эжем 60тан ашты, жалгыз иштеп, 4 баласын багат. Алар отуздан жогору жашта. Бул балдары үчүн күнөө эмеспи? 077351...
-Балдары үчүн күнөө. 30 жаштан ашкан балдар кантип 60тан ашкан апасын иштетип коюп отурушат?! “Жаштыгында берсин мээнетти, карыганда берсин дөөлөттү”. Эрезеге жеткирип койгондон кийин балдар ата-энени багышы керек. Жок дегенде Ош базарга барып тачки тартып иштесин.
-Жолдошум менен жашабай калганыма 5 жыл болду. Ажырашкан эмеспиз. Турмушка чыксам болобу? 077215...
-Муну такташ үчүн өзүңөр бизге кайрылгыла.
-Аял киши жылаңбаш отуруп куран жаттаса болобу? Аллакул
-Үйдүн ичинде болсо жылаңбаш отуруп жаттай берсе болот. Жоолук салынып отуруу- адептүүлүк катары бааланат.
-Айланайын Кудай, жан Кудай деп дуба кылса, Аллага жалбарса болобу? 4 рекет намазда 5-рекетке туруп кетсе эмне кылуу керек?
-Ооба. Жан Кудай дегени жаным Кудайга курбан, Кудай өзү жаратып, өзү алат деген сөз да.
5-рекетке туруп кетсе саждага бара элек болсо кайтып келип намазды бүтүрүү керек. Саждага барган болсо дагы бир рекет кошуп, 6 рекет намаз окуп бүтүрүү керек.
-Мен куран жаттайын десем эске тутуум начар. Дубасы барбы эске тутууну жакшыртуунун? Эмне кылышым керек? Али
-Эске тутууну жакшыртуунун жолу кайра-кайра окуу. Имам Бухариге “сиз жакшы жаттайсыз” дешкенде “көп караймын” деп жооп берген. Мен, Чубак ажы Жалилов жаттоосу эң начар адамдардын катарына кошулам.
-Гусул кылып аткан кезде суюктук чыгып кетсе кайрадан жуунуш керекпи же даарат алып койсо болобу? Аллакул
-Ооба, ошон үчүн жыныстык катнаштан кийин гусул алаардан мурда заарасын чыгарып жиберсин деп айтылат. Эгер заара чыкпаса суу чачсын. Ошондон кийин жуунса чыккан учурда да маани берилбейт. Дароо эле жуунганда суюктугу чыгып кетсе кайра гусул алуу керек.
📲 Жүктөгөн:
Бейшегул Амира кызы
🌱 ИЛИМ БУЛАГЫ Группасы:
Бизге катталыныздар!
🚹 0559-85-40-65
🚺 0779-78-93-59
🚺 0551-76-96-97
🚺 + 7775-799-78-16
🚺 0703-92-79-55
Следующая публикация
Нет комментариев