ОНАЖОН!

БИР МАРТА ТУШИМГА КИРИНГ!
Ҳар тун Аллоҳимга ёлвориб такрор.
Биргина илтимос , илтижо
сўрай.
"Ё Аллоҳ! Илоҳий қудратинг кўрсат!
Тушимда онамни бир марта кўрай!"
Онажон! Соғиндим! Тушимга киринг!
Нурли юзингизни кўрай бир бора.
Соғинч ўртаяпти юрагим, бағрим.
Кунлар ўтган сайин ортар тобора.
Қанийди Каъбанинг олдида кўрсам.
Оппоқ либосларда турганингизни.
Иброҳим мақомида саждада, ёки.
Сафо, Марва аро юрганингизни.
Тушимда Равзанинг боғида кўрсам.
Бирга салом берсак Набий Акромга.
Ёки болалигим ўтган уйимда.
Алла айтганингиз жажжи укамга.
Сизга айтар сўзим кўпайиб кетди.
Қанийди сўзласам, бўшарди юрак.
Фақат сиз англайсиз кўнгил дардимни.
Фақат сиз бўласиз ҳар неда тиргак.
Ҳаёт синовлари баъзан эзади.
Дунё ташвишлари гўё бошимда.
Сўзласам, йўл- йўриқ топармидингиз.
Онажон! Тушимда келиб бошимга.
Йўқ, йўқ! Ташвишларни сизга айтмайман.
Чиройли бахтимдан сўзлаб бераман.
Сиз кўрмаган невара, эвараларнинг.
Ютуқлари, аҳдидан сўзлаб бераман.
Соғиндим, Онажон! Тушимга киринг!
Зора таскин топсам, соғинчлар кетса.
Бир марта, майли, бир мартагина.
Аллоҳ ўтинчларим, нолам эшитса.
Охирги сўзингиз эшита олмай.
Армонларда қолган бир қизман, Она!
Тушимда мен билан гаплашинг узоқ.
Зора шу армонлар ушалса, Она!
Онангиз ҳаётми? Чопинг ёнига!
Дуосини олинг эй азиз инсон.
Мастурахон каби тушда бир кўриш.
Кун келиб сизга ҳам бўлмасин армон!