Hayzga tegishli ba'zi masalalar Alloh taolo Baqara surasining 222- oyatida shunday deydi "Sizdan hayz haqida so'raydilar.

Ayting: U ko'ngilsiz-nopok narsadir. Bas, hayz paytida ayollaringizdan chetlaningiz va to (hayzdan) tozalanmagunlaricha ularga yaqinlashmangiz! (G'usl qilib) poklanganlaridan keyin ularga Alloh buyurgan tarafdan kelingiz. Albatta Alloh tavba qiluvchilarni va o'zlarini mudom pok tutuvchilarni sevadi". Imom Ahmad va Abu Dovud Abu Hurayra roziyallohu anhudan rivoyat qilgan hadisda Rasululloh sollallohu alayhi va sallam: "Kim folbinga borsa va u aytayotgan xabarni tasdiqlasa yoki ayoliga uzrli-hayz holatida yaqinlik qilsa yoki ayolining orqasiga yaqinlik qilsa Muhammadga nozil bo'lgan narsa (ya'ni din)ga kofir bo'libdi", dedilar. Imom Buxoriy rivoyat qilgan hadisda Oisha roziyallohu anho shunday deydi: "Bizlardan birovimiz hayz holatida bo'lsayu, Rosululloh sollallohu alayhi va sallam undan kiyimsiz holatida foydalanmoqchi bo'lsalar, hayz o'rniga izor (beldan pastiga kiyiladigan kiyim, lungi) kiyib olishni buyurar, so'ng undan foydalanar edilar." Imom Buxoriy rivoyat qilgan hadisda Ummu Salama roziyallohu anho shunday deydi: Men Rasululloh sollallohu alayhi va sallam bilan birga adyolda yotgan edim, to'satdan hayz ko'rib qoldim. Sekin turib hayz libosimni oldim. Rasululloh sollallohu alayhi va sallam: - Hayz ko'rdingizmi?, dedilar. - Ha... dedim. Meni yonlariga chaqirdilar va birga adyolda yotdik. Sharh: Islom dini eng mo''tadil din, u boshqa dinlarga o'xshash g'uluv- chuqur ham ketmagan, insonlar o'rtasidagi muomalalarga yuzakilik bilan beparvo ham qaramagan. Hayzning erkaklarga xos bo'lgan - ayolining jinsiy a'zosidan boshqa o'rinlaridan foydalanish yoki u bilan birga yotish kabi hukmlari ham borki, musulmon kishi taqiqlangan ishlarga tushib qolmasligi yoki joiz bo'lgan ishlardan tiyilib o'zini qiynamasligi uchun bu hukmlarni o'qib-o'rganishi lozim. Bugungi darsdan olinadigan foydalar: 1- Hayz ko'rgan ayol bilan qo'shilish harom, gunohi kabiralardan. 2- Hayz ko'rgan ayol agar ich kiyimini kiyib olgan bo'lsa, uning jinsiy a'zosidan boshqa o'rinlaridan foydalanish mumkin. 3- Hayz ko'rgan ayol bilan uxlash, ovqatlanish, suhbatlashish va boshqa muomalalarni qilish joiz. 4- Ayol kishining orqa tarafiga qo'shilish gunohi kabiralardan.