Предыдущая публикация
Ҳаёт денгиз, умр бир кема,
Келиб кетмоқ ўйинчоқ дема.
Тафаккур қил, фикр қил, дўстим
Яшамоқдан мақсадинг нима?
Мажнун бўлдинг сапчиб самога,
Борлиғингни тутдинг Лайлога.
Айт — не учун келдинг дунёга
Яшамоқдан мақсадинг нима?
Гоҳ текис йўл, гоҳо чоҳдасан,
Гоҳида хор, гоҳ ардоғдасан.
Нима учун яшамоқдасан,
Яшамоқдан мақсадинг нима?
Кенг дунёни қиласан вайрон,
Қилмишингга ўзинг ҳам ҳайрон.
Ўз-ўзингга савол бер инсон,
Яшамоқдан мақсадинг нима?
Сийму-зарга тўлмоқ истадинг,
Олам шоҳи бўлмоқ истадинг.
Нима эди асл истагинг
Яшамоқдан мақсадинг нима?
Кериласан мағрурсан, ҳайҳот,
Кеккайганни синдиргай ҳаёт.
Мол-дунёси тўлиб тошган зот
Яшамоқдан мақсадинг нима?
Бурда нонга қилдинг қаноат,
Шудгор қилдинг, экдинг зироат.
Қарашингда минг бир синоат,
Яшамоқдан мақсадинг нима?
Насиҳатим келмасин малол,
Бир бор келар, эркакми, аёл.
Гулдек умринг бўлмоқда завол,
Яшамоқдан мақсадинг нима?
Хор қилганлар кун келиб хордир,
Увол қилган бир куни зордир.
Ҳар бир куннинг ҳисоби бордир,
Яшамоқдан мақсадинг нима?
Ғафлат ўтин юлмаган одам,
Умр бўйи кулмаган одам.
Одам қадрин билмаган одам,
Яшамоқдан мақсадинг нима?
Рустам — нелар чиқар йўлингга,
Нечун қалам тутдинг қўлингга.
Не сирларни тугдинг дилингга,
Яшамоқдан мақсадинг нима?
Кимга давлат, кимга бахт керак,
Кимга иқбол, кимга тахт керак.
Кеча-кундуз бедорсан юрак,
Яшамоқдан мақсадинг нима?
Следующая публикация
Нет комментариев