Հայաստանի վարչապետ Հովիկ Աբրահամյանի գլխավորած պատվիրակությունն այսօր՝ օգոստոսի 9-ին, գիշերելու է ԼՂՀ մարտական դիրքերում: Այս մասին ԼՂՀ կատարած պաշտոնական այցի ժամանակ լրագրողների հետ զրույցում ասել է վարչապետը:

«Մեր այցի նպատակը մեկն է. լինել առաջին գծում՝ մեր զինվորների կողքին: Խանդավառություն կա ե'ւ Հայաստանի, ե'ւ Լեռնային Ղարաբաղի Հանրապետությունում: Ժողովուրդը, հասարակությունը միասնական են անվտանգության հարցում: Դա շատ կարեւոր է: Յուրաքանչյուր քաղաքացի պետք է հասկանա, որ Հայաստանի անվտանգությունը սկսվում է Արցախի անվտանգությունից, եւ եթե Արցախում ամեն ինչ ապահով է, ապա Հայաստանի Հանրապետությունը նույնպես անվտանգ է»,- ասել է նա:
Հովիկ Աբրահամյանի խոսքով՝ իրենց միակ ցանկությունն այն է, որ հակամարտությունը լուծվի խաղաղ բանակցություների արդյունքում, բայց «եթե հայերին պարտադրում են եւ դիպուկահարներն անընդհատ փորձում են սպանել մեր զինվորներին», ապա հայկական կողմն ունի այդ հնարավորությունը` պաշտպանելու մեր հողն ու երկիրը:
«Մեր նպատակն է՝ ծանոթանալ խնդիրներին, փորձել աջակից լինել նաեւ բարոյապես, որպեսզի մեր զինվորները հասկանան, որ իշխանություններն ու ժողովուրդն իրենց կողքին են: Եկել ենք Լեռնային Ղարաբաղ եւ գիշերը լինելու ենք դիրքերում, առաջին գծում մեր զինվորների կողքին: Մենք որեւէ աջակցություն չենք խնայելու, որպեսզի մեր բանակը լինի ավելի մարտունակ: Մենք յուրաքանչյուր ֆինանսական ռեսուրս պատրաստ ենք տրամադրել՝ զինելու մեր բանակը, պաշտպանելու մեր հողը, սահմանը: Մենք այլընտրանք չունենք»:
Ավելի վաղ ԼՂՀ նախագահ Բակո Սահակյանի հետ հանդիպման ժամանակ Հովիկ Աբրահամյանին առաջարկել են ձեռք բերել այնպիսի սարքավորում, որը թույլ կտա դիտարկել ամբողջ սահմանը: ՀՀ կառավարության անդամները խոստացել են քննարկել հարցը:
Նշենք, որ Հովիկ Աբրահամյանի հետ Արցախ են մեկնել Հայաստանի պաշտպանության նախարար Սեյրան Օհանյանը, խորհրդարանական խմբակցությունների պատգամավորներ: Առավոտյան պատվիրակությունը զրուցել է նորակոչիկների երդման արարողությանը մասնակցող ծնողների հետ, այնուհետեւ հանդիպել Արցախւ Հանրապետության նախագահի, ԱԺ նախագահի եւ վարչապետի հետ: