Ղարաբաղյան հակամարտության շփման գծում իրավիճակի սրումը խուճապ է առաջացրել Ադրբեջանի սահմանային մի շարք բնակավայրերի բնակչության շրջանում: Այս մասին օգոստոսի 7-ին կայացած Կառավարության նիստում հայտարարեց Հայաստանի պաշտպանության նախարար Սեյրան Օհանյանը:

«Այդ պատճառով այնտեղ ուժեղացվել են վարչական ու ոստիկանական ռեժիմները, հստակեցվում են զորահավաքի ծրագրերը»,- հավելեց նախարարը: Ադրբեջանը զորանոցային դրության անցնելու միջոցառումներ է ձեռնարկում. զինվորական անձնակազմի հավաքագրում է հայտարարվել, զորամասերը բերվում են մարտական ուժեղացված պատրաստվածության ռեժիմի: Անձնակազմի եւ տեխնիկայի փոխադրման դեպքեր են արձանագրվել:
Ընդհանուր առմամբ, ըստ Հայաստանի պաշտպանության նախարարի, 2014 թվականը լարված տարի էր Հայաստանի եւ Լեռնային Ղարաբաղի համար: Ադրբեջանը շարունակել է ռազմատենչ հռետորաբանությունն ու զենքի վազքարշավը: Եթե ամբողջ 2013 թվականի ընթացքում հրադադարի ռեժիմի խախտման 13 հազար դեպք է արձանագրվել, ապա 2014 թվականի սկզբից՝ արդեն 148 հազար: Տարեսկզբից դիվերսիոն-հետախուզական ներթափանցման 26 փորձ է արձանագրվել, դրանցից 15-ը՝ հուլիսի 25-ից հետո: «Ադրբեջանական կողմը ցանկանում է ազդել բանակցային գործընթացի, ներքին լսարանի վրա եւ ազատվել թերարժեքության բարդույթից»,- նկատեց Օհանյանը:
Նա նաեւ հավելեց, որ հայկական կողմն իր հերթին մի շարք միջոցառումներ է անցկացրել: Նախ, Զինված ուժերն ուժեղացրել են վերահսկողությունը՝ առանց մարտական պատրաստականության: Հրամանատարական կետերն աշխատում են 24-ժամյա ռեժիմով: Ուժեղացվել է շփման գծում վերահսկողության ռեժիմն ու հրադադարի խախտման մասին հաղորդումները:
«Մեր զինվորի մարտական ոգին չափազանց բարձր է՝ քաջության եւ հասարակության լայն շերտերի աջակցության, ինչպես նաեւ մեր մարտական ընկերների, Արցախյան պատերազմի վետերանների հետ հանդիպումների շնորհիվ, ովքեր մասնակցել են մարտական հերթապահությանն ու զինվորներին ոգեշնչել իրենց փորձի փոխանակմամբ»,- հայտարարեց պաշտպանության նախարարը: