Ярый әле уйларым бар
Нишләр идем алар булмаса ?
Үткәннәргә кайта алмас идем
Тик хыялда гына булсада...
Бала чагым эзләп киләм
Каз үләне үскән урамнан
Тәгәрәп ятып җиләк җыйган
Хуш ис бөрккән яшел аланнан .
Бүгенгедәй күз алдымда тора
Чыр - чу килеп сулар керүләр
Малайларның "өлешләрен " тешләп
Елый - елый кием сүтүләр ....
Хәтеремдә әле ,капка төбе
Яшьлегемнең айлы кичләре ,
Аның кыяр - кыймас кына ,
"Сөям " дигән назлы сүзләре .
Туган йортның бусагасын атлап
Карап торам яшьле күз белән.
Шаулы тормыш кайный анда ,
һәр бересе мәшгүль эш белән ,
Мич алдында әни бөтерелә
Алъяпкычын бәйләп биленә .
Башындагы ак яулыгы
Бигрәк килешеп тора үзенә !
Мичен җыя,көйли - көйли ,
Икмәккәе күпереп кабарган ,
Бит очлары матур булып
Алсу алма кебек алланган !
Өстәл өстә самавыры җырлый
Тирә якка бер моң тарата .
Ул җыр еллар аша күңелемнең
Үтә нечкә кылын тибрәтә ,
Самавырда марля белән элеп
Йомыркасы пешэ тезелеп.
Кызыл галстук, тасмаларны
Үтеклиләр кызлар чиратлап
Ә,нәнәем чәй әзерли, энэ
Такта чәйләрен салып.
Хуш исле, тәмле чәйләрне
Эх..., эчәргә иде, бер өреп .
Учларына салып,әти шикәр вата
Тигез итеп бүлә барсына .
Ул шикәрнең тәмен тоям әле
Оныта алмам гомер буена .
Ничек бары да сыйган
Бәләкәй генә шул өйдә ?
Ишек төптә бозау ,ничә оя казы
Мич кырында бәрәннәре дә .
И, Ходаем , исәнлекләр бирсен
Хәтирәләр торсын яңарып !
Үткәннәргә юллар булмаса да
Уйлар белән була кайтарып !
Аксәет ХУЗИНА ФИЛАРИСА 24 02 2019
Присоединяйтесь к ОК, чтобы подписаться на группу и комментировать публикации.
Нет комментариев