Предыдущая публикация
Модари ман, аз ту ҳаст аъзои ман,
Хуни ман аз туст дар рагҳои ман,
Аз ту нури дидаи бинои ман,
Ин туӣ созандаи дунёи ман,
Модари ман, модари яктои ман.
Аз барои ман кашидӣ чор дард,
Ҷисму ҷони нотавон парво накард,
Рӯбарӯ бо марг гаштӣ дар набард,
Омадӣ ғолиб ту бо рухсори зард,
Модари ман, модари яктои ман.
Ман ки таб кардам, дили ту ғам гирифт,
Нотавонам дида, чашмат нам гирифт,
Худ надонӣ, кай вуҷудат дам гирифт?
Коми дил мебояд аз олам гирифт.
Модари ман, модари яктои ман.
Мешунидам алла, мехуфтам сипас,
Буд дармоне бароям дастрас,
Мекушодам бол дар авҷи ҳавас,
Н-оядо бо ту баробар ҳеҷ кас,
Модари ман, модари яктои ман.
Шод будӣ, чунки мактабхон шудам,
Аз дилу ҷон толиби ирфон шудам,
Донишам афзуду боимон шудам,
Бар сабақгӯ гӯш бар фармон шудам,
Модари ман, модари яктои ман.
Аз муҳаббатҳои ту ҳарфе занам,
Пок дорам ман аз он ҷону танам,
Шукр гӯям, садди сад раҳ бишканам,
З-он сазоворам ба халқу меҳанам,
Модари ман, модари яктои ман.
Ман Ватанро дидаам аз рӯи ту,
Рангу бӯяшро зи рангу бӯи ту.
Як бувад бо сурати некӯи ту,
Ҳақ расад аз шоири ҳақгӯи ту,
Модари ман, модари яктои ман.
Шод ҳастам аз саломат буданат,
Босадоқат, бошарофат буданат,
Чашмаи поки муҳаббат буданат,
Боғи сабзи пуртароват буданат,
Модари ман, модари яктои ман.
Бо Ватан, донам, ту ҳастӣ, модарам,
Тарҳи он аз хеш бастӣ, модарам,
Ормони дил шикастӣ, модарам,
Аз гузаштанҳо гусастӣ, модарам,
Модари ман, модари яктои ман.
Следующая публикация
Нет комментариев