Мен ўзимдан розиман бугун,

Ўзимга мен таҳсинлар айтай.
Шунча битдим ўзгалар учун,
Бугун ўзим ўзимга битай.
Мен ўзимдан розиман бугун,
Кўнди йўғим боримга эссиз.
Нега кўндинг тақдир шўрига,
Яшаб келдим хаёлсиз, ҳиссиз.
Мен ўзимдан розиман бугун,
Қойил қолдим сабрларимга.
Ўйлаб кўрсам бардош бермайди,
Тоғ ҳам кўрган жабрларимга.
Мен ўзимдан розиман бугун,
Ҳеч ким қадрим билмади мендек.
Дунё тенгмас, пасту баланд бор,
Назаримда ўзим ҳам тенгдик.
Мен ўзимдан розиман бугун,
Топганларим саробдан ортиқ.
Шунчалар ҳам сахийман, ҳатто,
Ўзим емай қилганман тортиқ.
Мен ўзимдан розиман бугун,
Рози бўлинг сиз ҳам отажон.
Ўлсам тинчиб ётолмайман-ку,
Рози бўлинг сиз ҳам онажон.
Мен ўзимдан розиман бугун,
Дариғ тутма, меҳр-конингни.
Рози бўлинг сиз ҳам азизлар,
Дуо қилинг, Зухриддинжонни.