Кел, бугун бир дилингни оч, қалб ёришсин чарақлаб,

Оҳ Онажон, юрагингда мен билмаган дардлар бор.
Умр деган тақвимни гар, чиқсам бир-бир варақлаб,
Қутланмайин қолган қанча саккизинчи мартлар бор.
Йўлларим кўп Она менинг, дийдорингга бормаган,
Юрагингнинг сўқмоғидан сал чеккалаб ўтилган.
Сенга атаб битмоқ учун, тилимда сўз қолмаган,
Сенга дея олинган гул, бошқаларга тутилган...
Эрта яна қуруқ қўлим... битмагай ҳеч хатолар,
...ва биламан, ҳеч қандайин ғараз ҳам йўқ, ғавғо йўқ.
Синглимга гул, қизимга бол, аёлимга матолар,
Нима қилай, бу дунёда сенга лойиқ совға йўқ!
Таваллуд кун, ийду Наврўз, саккизинчи март ўтар,
Бирор туҳфа олмоқ учун найрангинг йўқ, Онажон.
Ҳар тунингда бир озору, ҳар кунингдан дард ўтар,
Тақдир номлиғ тақвимингда байраминг йўқ, Онажон!
Шоир эмиш.. мен нодонман, нодонлигим сир эмас,
Хушомадлар ҳилқатидан кўнглим кўкка етарди.
Байрамларда, ҳузурингга бир дардчимол шеър эмас,
Гул кўтариб борадиган ўғил туғсанг, нетарди?!
Кийгин , она, нима бўпти, бугун бир янги кийсанг,
Ҳеч байрамда янги кийиб юрмагансан, алдама.
“Қариб қолдим, энди менга байрам татирми...”, дейсан,
Ёшлигингда ҳам рўшнолик кўрмагансан, алдама.
Эътирофнинг этин татиб, кибр сувин ичгайман,
Мақтанаман, менинг кўнглим – кўнгилларнинг дуркуни.
Мен ўзимга мафтун бўлиб, баҳорлардан кечгайман,
Сенга лойиқ совға излаб, кеч қоламан бир куни.
Байрамларда, ҳузурингга бир дардчимол шеър эмас,
Гул кўтариб борадиган ўғил туғсанг, нетарди?!
Qishlogimizdagi va guruhimizdagi barcha qizlarni bayram bilan tabriklayman. Har doim go'zal va maftunkor bo'lib yuringlar!