Հենրիխ Մխիթարյան.

«Անգլիա տեղափոխվելու մասին լուրե՞ր. երևի ինձ Մովսիսյանի հետ եք շփոթում»
- Նախաձեռնությունը սկսել ենք Դոնեցկի «Շախտյորի» հետ համատեղ, անցած տարի, երբ դեռ խաղում է դոնեցկյան ակումբում: Փորձել ենք օգնել մի մանկատան, որը կարիք ուներ, կարծում եմ` չենք սահմանափակվի սրանով, կփորձեքն ուրիշ մանկատների էլ օգնություն ցույց տալ: Ճիշտ է` անցած տարի այս ժամանակահատվածում չկարողացա այստեղ գալ, քանի որ զբաղված էի նոր ակումբ տեղափոխվելու գործերով, իսկ այս տարի արդեն ազատ ժամանակ ունեի, և կարողացա մասնակցել այս սրահի բացմանը, թեև այն արդեն օգտագործվում էր:
- Որքա՞ն գումար է ծախսվել այս դահլիճի կարգավորման համար:
- Կարրծում եմ` գումարի չափը կարևոր չէ, կարևորն այն է, որ երեխաները օգտվում են այս դահլիճից, ինչը առաջ հնարավոր չէր անել:
- Հնարավո՞ր է` նույնպիսի ակցիա լինի նաև Դորտմունդի «Բորուսսիայի» հետ:
- Ինչու ոչ, եթե նրանք ցանկություն ունենան, առաջարկ լինի, կօգնենք անպայման:
- Ի՞նչ խորհուրդ կտաք այս երեխաներին:
- Խորհուրդ կտամ առաջին հերթին լավ մարդ դառնալ: Թե ինչ մասնագիտություն կընտրեն, իրենց խնդիրն է, բայց կցանկանամ, որ իրենց մասնագիտության մեջ հաջողակ լինեն: Ամենակարևորն այն է, որ մարդը աշխատանքի շնորհիվ կարող է հաջողության հասնել:
- Իսկ ինչու՞ ընտրեցիք հենց Գյումրի քաղաքը:
- Ճիշտն ասած` առաջարկ չի եղել, պարզապես ինձ խորհուրդ տվեցին հենց այս մանկատանը օգնել: Եթե խորհուրդ տան ուրիշ քաղաքներում, կամ Երևանում, անպայման կօգնեմ:
- Արդյո՞ք օգնությունը կամ բարեգործությունը միայն մանկատներով կսահմանափակվի, և ինչ հաճախականությամբ կլինեն նման ակցիաները:
- Եթե տեղյակ եք, նախորդ երկու տարիներին եղել եմ Արցախում, օգնել եմ զոհված ազատամարտիկների ընտանիքներին: Հնարավորինս չափով փորձում ենք օգնել այն մարդկանց, ովքեր դրա կարիքը ունեն:
- Որքանո՞վ են իրականությանը համապատասխանում անգլիական ակումբ տեղափոխվելու լուրերը:
- Ի՞նչ լուրեր: Երևի ինձ Յուրա Մովսիսյանի հետ եք շփոթում (ծիծաղում է): Ես հիմա Դորտմունդի «Բորուսսիայի» ֆուտբոլիստ եմ,ոչ մի առաջարկ չունեմ, գլուխս կախ մարզվում եմ, փորձում եմ օգտակար լինել թիմին և ազգային հավաքականին: