Предыдущая публикация
Og‘riq tursa agar jismu joningda,
Shirin so‘zga mushtoq bo‘lgan oningda,
Yomon bo‘lar, og‘ir bo‘lar, juda og‘ir —
Vafodoring bo‘lmasa gar yoningda.
Dunyoga termulgan ko‘zlaring tolar,
Odamlar qalbingga og‘riqlar solar.
Yashashning ma’nosi, sehri yo‘qolar,
Vafodoring bo‘lmasa gar yoningda.
Molu davlat balki bisyor bo‘ladi,
Xushomadlar garchi tayyor bo‘ladi,
Yuragingga g‘amu g‘ussa to‘ladi,
Vafodoring bo‘lmasa gar yoningda.
Senga oshnolar ham yuzin buradi,
Omad kelgan insonlarga yuguradi,
Xiyonatdan aqlu hushing lol turadi,
Vafodoring bo‘lmasa gar yoningda.
Sarson-sarson izlagaysan mehrni,
Kimlardandir ko‘zlagaysan mehrni,
Topolmasdan bo‘zlagaysan mehrni,
Asrorbeking bo‘lmasa gar yoningda.
Следующая публикация
Нет комментариев