Предыдущая публикация
Неки синоатлар шай турар, илло,
Оқ-қора рангга ҳам жило қўшайлик,
Кўнгилни даргоҳим дегандир Алло,
Ўша кўнгилларни овлаб яшайлик!
Турмуш машаққати елкаларда юк,
Ҳар қалбнинг ноилож бир чети куюк,
Инсон буюк эмас, ҳиммати буюк,
Келинг, кўнгилларни овлаб яшайлик.
Етимнинг қошида жаннатга йўл бор,
Меҳрингиз нуридан қиш бўлур баҳор,
Биздан ҳеч кимсага етмасин озор,
Келинг, кўнгилларни овлаб яшайлик.
Узилар қарзларни узишни кўзлаб,
Юраклар бутунлай қолмасдан музлаб,
Сўзласак энг ширин сўзларни сўзлаб,
Келинг, кўнгилларни овлаб яшайлик.
Сўзимни малолга олманг, биродар,
Мен ҳам бир ожизман кезган дарбадар,
Оз қолган Қиёмат Қойимга қадар,
Келинг, кўнгилларни овлаб яшайлик.
Малика Салимова
Следующая публикация
Нет комментариев