Мемнан шемеч.

Шошым капка онылно лум шулен, урем дене эртыше тыгыде вÿдшор Элнетыш ушнен йоген кайыш. Лум йымалнысе шаршудо кече вийым шижын, ужаргаш тÿҥале. Шаршудылан кöра капка йымал рож гыч лектын агытан шулдырым шарен чыве кашакым шке декше ÿжын. Нерешташ тÿҥалше шудо мучашым шупшкеден пагарым темаш, ала - мыняр чыве капка ончыко лектын. Шошо кечылан кö, тыгай годым огеш куане? Тиде жапыштак шемеч телым лумышко шке кудалтыме лу моклака дене модын, чыве коклышке толын лектын. Самырык пий шонен огыл чывым сусырташ. Шкеж гаяк йолташым муынам шонен, то йол гыч, то шÿй гыч пурлын ик мунчышо чывым аҥыртарен пыштен.
Тидым ужын авам, Япык ватын изи эргыжым пычал дене толаш кÿштыш. Шемеч нимат огеш умыло пече меҥге воктене авамын кылтыме кандыра мучашым пурын модын шога. Мемнам ончалеш шегел йолыш шинчын, пурлашке да шолашке вуйжым кышкылтеш. Утлаш толашымыла кандырам шупшкеда. Ний кандырам шупшылын, пурлынат онча, кандыра пышкем сайын кылталтын.
Япык ватын изи эргыже мыйым ончалын шинча вÿдым ужын мыйын авалан каласыш,- «Тышакын огына пудештаре, Ефим Санян пакча шеҥгел нöлпö коклашке нагаена, вара тушакынак кодена». Мый эшеат йÿкым луктын шортын колтышым,- «Ик ош чывылан кöра тыйым илышым авам ынеж кодо». Япык ватын изи эргыже шемечым руден, пычалым вачеш сакен мыйым эркын шуралтыш, мый почешыже ошкыльым. Шемеч, презым вÿден коштмо кандырам виян шупшын ончылно кудалеш. Мый пычалан еҥын кидыште Шемечым йолыштымо кандырам ончен тугак шортам.
Пакча шеҥгеке мийен шогалмеке, Япык ватын изи эргыже шемечым кандыра гыч мучыштарыш. Шемеч мемнан йыр кудалыштеш, йолжо дене шаршудымат удыралеш, куаныме дене йÿкымат луктеш. Тидын годым пычалым кÿшкö виктен, Япык ватын изи эргыже пудештарен колтыш. Шемеч лÿдын, воктечна нöлпö коклаш пурен йомо. Пычалан еҥ ÿмбаке мый порын ончальым, тудо мыланем шинчам пÿале, мый умлышым.
Мöҥгыш толмекем авам каласыш, « вашкаш огеш кÿл улмаш, аманыше чыветат кынелын». Кугун шÿлалтен пий кöршöкым мушкын шындыш.
Эрлашым эрдене кынелын, кудвечыш лектым, ончем яндар пий коршöк гыч шемеч тамыле кочкышым кочкеш. Воктеныже авам Шемечын кочкын пытармыжым вучен, шÿр миске дене тудлан кочкышым ешараш вучен шога.