КАВТО ПОКШЧИТЬ - КАВТО КЕНЯРКСТ

Течи Эрзянь келень Чи. Тензэ 28 иеть. Од цёрань. Стинь колмо чассо. Котьминь интернетсэ. Вете чассо лисинь эрьва чинь чийнемань кирькссэм ютамомо. Кото пельмартова валскень ярсамо. Кирьвазтинь Штатол.
Пшкадинь Инешкипазонтень:
Инешкипаз, Вере Чипаз!
Тон, марицясь, кода тикше касы,
Тон неицясь, кода пеште панжи.
Неимизь, марямизь!
Сюконятано пильгезэть,
Пшкадтяно валдо оймезэть.
Верев кепедьсынек кеденек,
Масторов нолдасынек сюкпрянок.
Ознотано эрицянок кис,
Ознотано раськенек кис,
Паксясо видевксэнек кис,
Кардазсо ракшанок кис.
Инешкипаз! Макст тенек
Сэтьме, лембе пиземеть,
Чачост касост сюронок,
Касост кепедевест тяканок,
Раштыцят улест аванок.
Макст Масторонтень ладямо,
Вейке-вейкень вечкема.
Лисьмакс парот лисезэ,
Леекс эрьметь чудезэ.
Кенкш пряваяк совазо,
Кенкш алгаяк ютазо.
Минь Тонеть - шумбракши!
Тон миненек - шумбрачи!
Паз, чангодть!
Паз, чангодть!
Паз, чангодть
Кодамо домка, превей, манейчи неть умонь-умонь валтнесэ, алкукскак сырнеде сырнеть, питнейде питнейть. Кода а вечкемс те раськенть, те келенть, сеть ломантнень, конатне шкинизь сынст! Сюкпря тенк, покштянь покштят!
Омбоце кеняркс, омбоце кенярксчи - Эрзянь келень чинть каршо лиссь "Арсеман монь, арсеман..." электрононь книгам. Сон интернетсэ эрзянь кельсэ сёрмадозь васенце книга! Эйсэнзэ келей ёвтнема (повесть), ёвтнемат, статьят, эрзянь келенть куловтомадо тешкст. Совавтодо вешеманень кундонтень валт: книга, Нуянь Видяз, "Арсеман монь, арсеман..." ( http://litres.ru/nuyan-vidyaz/arseman-mon-arseman/ ). Теевтядо содавиксэкс те нолдавксонть марто. Эйсэнзэ 380 ёнкскеть. Статьятне максовить рузонь кельсэ. Срадсть арсеман модамасторонть келес. Те, арсян, - изнявкс, покш лезэ эрзянь келентень.