Предыдущая публикация
Сире Теризморгань мокшень панархне мазыхть фалу!
Мокшетнень щамсна лама веконьберьф аф весть полафнесь. Тянь можна азомс кода анокламаснон, стане и котфснон колга. Каньфонь котфть и понань сюретнень вастс сашендсть хлопчатобумажнай котфне, тесьмась, мулинесь. Ошень модась шашфтозе шири народнай щамть, но мокшень костюмсь тянемс ляткшни коень ванфтыкс, мастерхненди од тевс кярьмодемати кошардыкс. Традиционнай костюмсь лезды лама содамс мокшень культурать колга.
«Живое древнее искусство. Традиционная вышивка села Старая Теризморга» изданияса мялень салайста пачфневи Старошайговскяй райононь Сире Теризморга велень мокшень щамть и сонь тииензон—тостонь мастерицатнень колга. Тячи содафттядязь центральнай группать, конатненди канневи Сире Теризморгань традиционнай щамсь, мокшень костюмонзон мархта.
ХIХ-ХХ векнень пингста синь ащесть несколька панарста, ожнаста тиф кели цифксста, конанди полатфтольхть оцю крганят и металлста подвескат, карксонь «цёкста» и «ватракшкаста», бокова моли нардамаста—«кеска руцяста», пряти щашендови «пангста». Ламоц узорхнень тевс нолямасна и лама тюсне тиендьсазь Старошайговскяй костюмть мяляфтовикс, содавикс.
Панархнень главнай мазоптомбяльсна—«сёрматне» (сюреса сёрмадомась). Кда корхтамс Сире Теризморгань панарть тюсонь композициянц колга, то ХХ векста сон ащесь основной ниле тюснень эзда: шобда-сенемста (шобда-коричневайста), якстерьста (шобда-мареновайста сявомок киноварнайти молемс), якстерьста и тюжяста. Якстерьса и шобда-сенемса тиендевсть основной стафксне. ХХ векть ушедомс сембе тюснень тиендезь кудса архтомать вельде. Равчть—лепень судста, якстерть—подмаренниконь юрста, тюжять—чередаста, сянгярять—келувонь лопаста.
Сюреса сёрмадомась тиендевсь геометрическяй орнаментть вельде, мезсь сотфоль «сюретнень лувксснон коряс» («по счёту нитей») техникать мархта. Контурсь мольфтевсь кафта ширдень стафксса—«сёрмаса», пяшкодемась—«кичкор стафксса». «Кочкавсь» тевс нолявсь панарть алуце пенц бордюронзон тиемста.
Панарть ланга сюреса сёрмадомась ульсь лафтуфнень, копорень стафкснень, эльть алуце пенц коряс, ожатнень лангса. Сон аф фкя лацоннель: полафнесь сянь эзда, кодама тевонди аноклакшневсь панарсь. Инь мазыхнень ёткс сувсесь свадьбань щамсь.
Колма ужеса ащи мяштень сатомшка крхкаста керф вастсь сюреса сташендовсь кафта тюсса. Кувака виде ожатнень и лафтуть мазопнезе «ожа кись»—сатомшка стака сюреса сёрмадомась, кона макссесь лем илань панарти. Эздонза ширеса, ожать вярде пялькссонза ульсть ожань аф оцю розетканят—«кядь ланга пе сёрматне» и «лафту пря сёрматне». Кядькргась мазопневсь «кядь пе» сюреса сёрмадомаса, кона пяк ладясь «ожа кити». Фталуце и ингольце котфне боконнетнень мархта полаткшневсть лентань орнаментса—«кувалмотнень» мархта, кона ингольде сюреса сёрматкшневсть панарть серенц эзда 1/3 пяльксса, а копорьса мольсть «лафту пря» розеткатненди.
Панарть алуце пенц мазопнезь сюреса сёрмадоматне, конатненди сувсесть ингольце керф вастть и котфть пец. Тяса тевс нолявсть замоксь—«урмацсь», «инголе сёрматне», «фтала сёрматне», «алгатне». Ожатнень кядькргасна и панарть элец сташендовсть тесьмаса, кона кодафоль 5 сурхнень лангса «кивиня» техникаса.
1950 кизотнень щамсь кой-мзярошкада полафтсь. Сяда содафокс арась «нула» платьясь, кона стафоль фабричнай котфнень эзда. «Нулась» щашендовсь панарть лангс. Од ломаттнень ёткса эвондась мяштеня мархта инголькссь—сатинцта или шёлкста «сапонясь». Сире Теризморгаса кушакса карьксаф ингольксть каннезь пяк нюрьхкяняста, штоба няеволь панарть эленц кудса или фабрикаса кодаф тесьмаста и кружевань зрнянь и сиянь сюреста ащи кели «петьксоц». Пряти сотнекшевсь понань равжа пунцовай оцю панчф пусма мархта павлово-посадскяй руця, кона, ванфтомок пангть форманц, сотнекшневсь алуце акша руцянять—«керьсафксть» ланга конянь сотксть «ашкотфксть» и пилетнень лангс повфневи мазоптематнень «соргонятнень» мархта.
Мастерицатне маштозь нолязь тевс мокшень стафкснень и крёзкс рузонь сюреса сёрмадомать, мережкать.
Тевсотольхть хлопчатобумажнай сюретне, а 1960 кизотнень песта—мулинесь, мезсь вятсь тюснень полафтомаснонды: основнойда башка, эвондасть сенем, розовай, оранжевай тоттне.
Мокшень щамсь арась Сире Теризморгати визитнай карточкакс. Но сон коль полафнесь. Кепотьксонди, арась сяда ёмлакс или юмась «урмаць» керф вастсь. Эвондась панарть копоренц башка декороц «копорсь»: лафту пакарьхнень ёткс кармасть сташендома якстерь и сенем ситцань китькст, конат меле полафтозь лентаста тяйня крёзкс тиф орнаментть.
Ожатнень кувалмосна ашесть полафта, но кядькргатне мазопневсть «кядьксса» или кенерьбакарти молемс якстерь сатинцта ожапряса. Илань щамти сташендовсть штапелень, ситцань ожат. Тяфтама панархненди кармасть мярьгома «мазы ожа панар».
Кода полафнесь Сире Теризморгань мокшень панарсь меле азонттама газетать сяда товолдонь номеронзон эса. Пади, эвондай мяленте, морафты ялганьке, пачфтемс эсь велень мокшень щамонтень колга, тяштеда «Мокшень правдав».
Следующая публикация
Нет комментариев