❗️ КОНКУРС ❗️ КОНКУРС ❗️ КОНКУРС

Мазыхть мокшень стиреньке
Кельгома морафтыеньке! 2025 кизоня «Мокшень правда» газетась сяда тов мольфтьсы «Мазыхть мокшень стиреньке» конкурсть, кона тняра кизоста тусь мялезонт. Мезе тиемс мокшень стирьхненди эсонза участиянь примаманкса? Пачфтема тянь колга редакцияв газетать электроннай почтанц, социальнай сетьтнень эса группанзон (газетать мекольце лопанянц эса улихть сембе адресне и ссылкатне), а стане жа телефонца гайфтемать вельде. Эряви, штоба конкурсанткать улельхть мокшень национальнай или стилизованнай щамонза-карямонза. Самок редакцияв, фотографоньке тии фотографият, а кда участницать сонцень улихть тяфтама фотографиянза—сядовок пара! Сяс, мокшень стирьхть, гайфнеда, тяшнеда—учтядязь!
Тячи содафттядязь тяддень омбоце участницаньконь, од «цёфксть» Алина Бакаевать мархта.
Шачсь-кассь мокшень стирсь Старошайговскяй райононь Сире Шайгав велеса Бакаефнень семьяса.
«Эряфонь кизе ушедсь велеса, коса фалу оцю мяль шарфневи национальнай ширети. Мокшень кяльть, коеньконь кельгидост и ванфтыдост аф кржа кода Сире Шайгавса, стане и целайнек районца. Улема, аф эльбядян, кда азса, што аймаконьконь мокшаванзон щамсна—фкя инь мазысь Мордовияса. А мезе тиихть сюреса сёрматф узороньке! Старошайговскяй райононь машты кядь мастерицатнень работасна содафт аф аньцек республикаса, а Россиянь ламоц лия уженятнень эса, нльне омба масторсовок. Сяс, шачемок асу тяфтама ломаттнень ёткса, аш кода аф кельгомс сембе тя мазышить»,—мярьгсь Алина Александровна.
Аляц, Александр Петрович, работцесь лама вастова, тяни заняф строямань тевть мархта. Шачемас коре Од Теризморгаста, конанди нинге мярьгихть Ожгане. Сон и рьвац, Татьяна Михайловна, тиезь семботь, штоба цёрасна Александр и стирьсна Алина касольхть цебярь ломанькс, тонафнельхть, кочкалезь эсь эряфсост эрявикс виде кить. И тя теест удалась.
Алина Бакаева васенда тонафнесь Сире Шайгав велень начальнай школаса. Нилеце классть шумордамдонза меле поладозе тонафнеманц средняйса. Нинге идень садса арась содафокс музыкать аф оцю пяльксканц—нотатнень-меснень мархта. А сяда тов Алина Александровна тянь коряс содамошинзон касфнезень Г.И.Сураевонь-Королёвонь лемса Старошайговскяй идень искусствань школаса. Васенце аськолкснень тиемс теенза лездсь преподавательсь Наталья Александровна Пронина .Идень искусствань школаса мокшень стирсь тонафнезень фортепианоть, музыкальнай лиянь инструменттнень.
Средняй школаса 11-це классть аделамдонза меле поступась Н.П.Огарёвонь лемса Мордовскяй государственнай университетонь Национальнай культурань институту, кочкамок «Искусство народного пения» специальностть, коса тяни тонафни колмоце курса.
Стирть мала ломанензон ули кода лемдемс музыкать мархта сотфокс. Аляц машты гармонияса морама. Цебярель тядянц вайгялец, Татьяна Михайловна мазыста морась. Альнякац, Александр Александрович, тонафнесь идень искусствань школаса баянца морама.
«Мокшэрзянь культураса башка васта занцихть моротне. Пуромихть ломаттне илань шрать ваксс—ладясазь вайгяльснон, ушедыхть мора, мельганза омбоцеть, колмоцеть. Тяфтома, улема, аф ётни раднянь фкявок васедема»,—мярьгсь мокшень стирсь.
И тя афкукс тяфта. Вов и Алина сась мяльс варжамс виензон морамань тевса. Благодарностень валхт газетать вельде азсь Василий Капровонди. Василий Иванович—Старошайговскяй идень искусствань школань преподаватель. Алина кизефтезе сонь, анась кядьстонза совет, мзярда арьсесь, коза молемс тонафнема сяда тов. Марса и кочказь Национальнай культурань институтть народнай морамать мархта сотф специальностть.
Мордовскяй госуниверситетса прослушиваниять ётамста консультация теенза макссь народнай музыкань кафедрань профессорсь Светлана Колесникова. Светлана Викторовна васенце курсста сявомок вятьсыне мокшень стирти вокалть коряс занятиятнень. Нинге сон—«Гайги моро» фольклорнай ансамбльть руководителец. Тя коллективса Алина Александровна ушедсь морсема вузу поступамдонза меле эстокиге. «Гайги мороть» мархта васенцеда лиссь сценать лангс кургса морама. Кочкась эстеенза Старошайговскяй райононь мокшавань щам, коса улихть и бабанц мазоптомбяленза. Теоретическяй получаф содамошитнень кемокснезень практикаса сценать лангса. И коль тонафнесь, тонафнесь, тонафнесь... А мелянь ноябрьста тердезь морсема Г.И.Сураевонь-Королёвонь лемса «Келу» фольклорнай ансамбльти. Содаф коллективть художественнай руководителец Светлана Колесникова азозе, што ули васта мазы вайгяль баяраватнень ёткса. Тяни Алина Бакаева тиендьсыне хоронь артистонь васенце аськолксонзон.
«Конешна, эсон ульсь таколдома, вдь «Келусь»—Мордовиять визитнай карточканзон эзда фкясь. Но фольклорнай ансамбльса васьфтемазь пяк лац, лямбоста, од ломанть тя фалу эждьсы, кемокстасы»,—мярьгсь героиняньке.
Творческяй тя коллективть мархта ульсь ни республикань ламоц райоттнень эса. Стаки морси «Гайги мороса», нинге работай «Келуса». Да и университетса тонафни. Стака-аф теенза? Мокшень стирсь шобдава эряскоды занятияс, меле, шить омбоце пялестонза, работама, илять—тага занятияс. Университетса преподавательхне шарьхкодьсазь сонь, кирдьсазь ширенц, но Алина Бакаева тиендьсы семботь, штоба кенеремс и университетса, и работаса. Саранскяйса эряй студенческяй общежитияса мархтонза тонафни ялганц мархта. Ваймама шитнень, кда аф заняф, эряскоды Сире Шайгаву.
Мазы, творческяй, отькорь, асу—тянь семботь ули кода азомс мокшень стирть Алина Бакаевать колга. Сембе цебярть тейть, Алина Александровна!
Татьяна Альшина.