Предыдущая публикация
Мордовия Республикань Заслуженнай артисткась Елена Зайцева:«Павазуван, мес покодян «Умаринаса»!
Кельгома ялгат! Вов и ушедсь Од кизось. Катк сон сембонди канды кеме шумбраши, сатфкст, паваз! А штоба тя пяшкодеволь, ушедомс тяддеть эряви цебярь арьсемаса, пара тевса. Вов и минь—«Мокшень правдать» коллективоц тиеськ семботь, штоба январень васенце номероньке туль мялезонт и эсонза лисьф материалхнень морафтомдост меле седисонт и ваймосонт улель лямбе. Лиякс азомс, старандаме редакциянь келеса. И республикань мазы вайгяль «цёфкснень» колга азондомать тядде панчсаськ «Умарина» моронь и кштимань Мокшэрзянь государственнай ансамблень хоронь артисткать, Мордовия Республикань Заслуженнай артисткать Елена Зайцевать квалма материалть эзда.
Шачемас коре Елена Николаевна Атяшевскяй райононь Киржеманы велеста. Мзярда тонафнесь омбоце класса, семьяц ётась эряма Атяшева посёлкав. Елена Подмарёвась—лама идень семьяста. Аляц, Николай Михайлович, работась милицияса участковайкс, тядяц, Нина Михайловна, образованияс коре бухгалтер. Стирнясь фалу лувондозе прянц «козя» ломанькс, вдь сонь ульсть колма брадонза, а сонць лувксс коре омбоцесь. Ужяленди, фкя брадоц тяни аш шиса.
Подмарёфнень семьяса фалу кайгсь музыкась. Семьянь азорсь, Николай Подмарёв, и сонь сембе брадонза лочазь лочасть гармонияса и баянца. И музыкальнай ня инструменттнень тонафнезь синць. Нина Подмарёвать и аканзон-сазоронзон мазыхть вайгяльсна, сяс синь сафнезь моронь морамаса.
Елена Подмарёва тонафнесь Атяшевань музыкальнай школаса. Морсесь и средняй школаса. Тяда башка, ялгаль спортть мархта, занцесь призовой вастт туризмать мархта сотф пялькстоматнень эса.
Школать шумордамдонза меле поступась М.Е.Евсевьевонь лемса Мордовскяй государственнай педагогическяй институтонь дошкольнай воспитаниянь факультету. Мес? Вов мезе отвечась Елена Николаевна: «Нинге шабакс ушедонь арьсема учителькс арамать колга и работамс начальнай класснень эса тонафни иднятнень мархта».
Сон мзярдовок ашезь явонда мороть мархта: аф школаса, аф педагогическяй институтса тонафнемста. Вузть аделамдонза меле, 1999 кизоня, примась участия «Шумбрат, Мордовия» Народнай творчествань фестивальса-конкурсса (Атяшевскяй районть эзда). Жюриса ульсь «Умаринать» художественнай руководителец Василий Четыркин. Елена Николаевна морась рузонь кяльса мора сольнайста. Василий Иванович тердезе сонь «Умаринав».
«Сань творческяй тя коллективу и лядонь «Умаринав». Меля топодсь 25 киза кода васенцеда аськолдайне порогонц»,—лятфни республикань Заслуженнай артисткась.
25 цифрась ётай кизоть эряфсонза васьфневсь нинге весть. 25 мартста, Культурань работниконь шиня, Елена Зайцевати максфоль Мордовия Республикань Заслуженнай артисткань лемсь.
Тяда башка, казьф Российскяй Федерациянь Оборонань министерствать «Участник военной операции в Сирии» медаленц, «Мордовия Республикать касфтоманцты-виияфтоманцты личнай путксонкса» Мордовия Республикань Оцюнять Почётнай знаконц, Мордовия Республикань Профсоюзть Почётнай грамотанц мархта.
Елена Николаевна «Умаринаса» кунара. Теенза ули мезе лятфтамс и пачфтемс. «Лама кизода инголе ушедонь работама асу ломаттнень ёткса. И тянкса оцю спасиба Василий Четыркинонди. Эста «Умаринаса» работасть Василий Грачев, сонь рьвац Мария Грачева, мирттне-рьвятне Василий и Любовь Числякне, Мирон Сыч, лиятне. И сембе монь, аньцек сафть, васьфтемазь пяк лац. Тянивок коллективсь пяк цебярь. «Умаринать» мархта ламоксть ётайне марнек Мордовиять, улень Россиянь ламоц региоттнень и ошнень эса, а нинге омба масторса—Францияса, Испанияса, Венгрияса, Белоруссияса, Сирияса. Кельгса работазень и павазуван, мес тняра киза покодян творческяй тя коллективса. Эрь мезне, сценать лангс лисемстон, марян кенярдема»,—азозе артисткась.
Вете кизода инголе «Умарина» моронь и кштимань Мокшэрзянь государственнай ансамбльти директоркс-художественнай руководителькс путфоль Наталья Касаткина. Елена Николаевна лама шнамань вал азсь Наталья Ивановнань колга. Сон, кле, пяк лац содасы эсь тевонц, работаса—вешфксу, но фалу анок лездомс и шарьхкодемс. Вешенди од морот, кштимат, проектт. Коллективсь сидеста уленди гастрольса, сяс кунара арась ладяй оцю семьякс, коса эрть мархта ули кода мумс марстонь кяль.
Стака-аф тевце? Тя кизефксть лангс Елена Зайцева отвечась, што инь оцю стакакс-сталмокс ульсь тушендомс командировкас и кадондомс ёмла иднянц.
Фкя «семьять»—«Умаринать» колга Елена Николаевна анок азондомс фалу. Кизефтеськ и сонцень семьянц колга. Эрзявась туф рьвакс. Мирдец, Денис Алексеевич, мороть и морамань тевть мархта апак сотт. Денис Зайцев шарьхкотькшнезе поланц, мзярда ся тушендсь командировкас, а сон ляткшнесь цёраснон мархта. Оцю лезкс унокть мархта макссесь щавась Нина Михайловна—фалу ваннекшнезе. А нинге—Елена Николаевнань брадонза и синь рьвасна.
Тяни Юрий Зайцев тонафни 11-це класса. Теенза морамань асусь ашезь ёта, но мазы вайгялец Елена Николаевнань брадонц стиренц. София Подмарёва тонафни Н.П.Огарёвонь лемса Мордовскяй государственнай университетса.
Елена Зайцевась сидеста уленди Атяшеваса тядянц ширеса. Посёлкаса эряйхть брадонзовок.
«2025 кизось «Умаринати»—юбилейнай. Тядде топоди 85 киза, сяс карматама работама сядовок творческяйста и эрьгавста. Надиятама, сембе арьсефоньконь ётафтсаськ эряфс!»—корхтаманьконь шумордамста мярьгсь Елена Николаевна.
Татьяна Альшина.
Следующая публикация
Нет комментариев