Предыдущая публикация
Юрий ЧЕЛМАКИН: «СЕМБОСЬ САТНЕВИ МАРСТОНЬ ВИЙСА»
21 ноябрьста ульсь Российскяй Федерациянь Налоговай органонь работниконь шись. Тянди лемтьф пуромкст ётафтовсть странаньконь сембе региононзон эса. Профессиональнай эсь иласнон налоговай оргаттнень эса работайхне кепотьф мяльса васьфтезь Мордовиясовок. Синь поздравляндазень и инь достойнайхнень ёткстост казезень Мордовия Республикань Оцюнясь Артём Здунов.
Казьфнень ёткса ульсь мокшалясь, Российскяй Федерациянь Федеральнай налоговай службать Мордовия Республикать эзга Управлениянц аналитическяй отделонц начальникоц, Российскяй Федерациянь государственнай гражданскяй службань 2 классонь советниксь Юрий Челмакин.
Теенза максфоль Мордовия Республикань Заслуженнай экономистонь лем, мезть мархта минь седи ваксста поздравляндасаськ. Газетаньконь тячиень номерсонза пачфттяма мокшалять колга.
Ёмла родинац—Пою мокшень велесь
Шачсь-кассь Юрий Иванович Инсарскяй райононь Пою мокшень велеса. Инголи тяфтама семьятненди, кодамоль синнесь, мярьгольхть интеллигенциянь семьят. Аляц, Иван Николаевич, лама киза работась велень школаса учителькс—вятсь физическяй культурань урокт, тиендезе семботь, штоба тонафнихне венемольхть эряфонь шумбра койхненди, кельголезь спортть. Тядяц, Пелагея Максимовна, велень Советса главнай бухгалтероль. Тяни сон пенсияса, эряй Пою велеса. Мирдец, ужяленди, кунара аш шиса, но мокшавать ширес сидеста сашендыхть Саранскяйста цёрац и стирец семьяснон мархта.
Юрий Челмакин школать шумордазе сиянь медальса, а меле поступась Н.П.Огарёвонь лемса Мордовскяй государственнай университетонь экономическяй факультету. Мокшень цёрась курокста тонадсь ошти, вузса тонафнемати. Ваймама шитнень, каникулатнень ётафнезень Пою велеса. Аделазе университетть «Экономика и управление производством» специальностьс коре.
Налоговай оргаттнень эса—31 киза!
1993 кизонь 15 июльста сявомок и тянемс мокшалять эряфоц кемоста сотф налоговай службать мархта. Лиякс азомс, тя тевса сон 31(!) киза. Кда азомс сядовок видеста, Юрий Ивановиченди тя работась—васенцесь и, тячиень шити самс, мекольцесь.
Экономическяй факультетса ветеце курсса тонафнемстонза, мзярда ёфси кржа пингта ляткшнесь дипломнай практикати, налоговайса ушедсь тиевома од структура—Налоговай расследованиянь управления, конань сяда тов лемдезь налоговай полициякс. Од Управленияв эрявсть ломатть. Экономическяй факультетста колма цёратне, конатнень ётксоль и Юрий Челмакин, кучфтольхть стажировкас. Тяфта лиссь, што сонь ётамдонза меле, Юрий Иванович ушедсь работама государственнай налоговай инспекторкс.
— Тевозень ушедыне отделса, коса начальникокс ульсь Екатерина Кирилловна Адаева—васенце наставницазе, тонафтыезе. Ся кизотнень заняфтолеме ниле налокнень мархта, синь панневсть Кинь фонду. Работаме и местнай налокнень мархта, конатнень эзда пяк ламоль,—лятфни Юрий Челмакин. https://mokshapr.ru/nashi-mokshanskie-synovya-i-docheri/yurij-chelmakin-sembos-satnevi-marston-vijsa/
Следующая публикация
Комментарии 1