Предыдущая публикация
Борис ГАГИН:
«КОЧКАЙНЕ СЯ ТЕВТЬ, КОНА МЯЛЕЗОН!»
Мокшень цёрась Борис Гагин работай врачекс-травматологокс-ортопедкс Ковылкинскяй центральнай районнай больницянь поликлиникаса. Несколька кизоста сон кенерсь мумс марстонь кяль ширезонза приёмс сашендыхнень мархта. Сувай ломанць Борис Борисовичень кабинетс, травматологсь-ортопедсь васьфтьсы сонь пара валса, кизефтьсы, мезсь вятезе поликлиникав. И тяда меле сайти уленди сяда тёждя азондомс урманц колга.
Борис Борисович шачемас коре Ковылкинскяй райононь Малав мокшень велеста. Тядянц, Светлана Васильевнань, и алянц, Борис Михайлович, Гагиттнень лемсна, содафт, арьсян, аф аньцек эсь районца, но и марнек республикаса. Синь работайхть Малав велень клубса и библиотекаса, конат фкя вельхкс алот Социальнай многофункциональнай центрать мархта. Мирдсь и рьвясь аш ни кода лама тиендихть минценнеть—мокшеннеть ванфтоманц, виияфтоманц и содафокс тиеманц инкса. Синь перьфкаст пуроптозь эсь лацост патриоттнень—Малавонь эряйхнень. Эрь шисна пяшксе од тевда: илат, васедемат, концертт... Стирьсна, Надежда Борисовна, профессияс коре экономист. А цёрасна, Борис Борисович, эряфонц сотозе эряфса инь питнить—шумбрашить и сонь ванфтоманц мархта. Мес? Тянь колга кизефтеськ сонцень. И вов мезе сон азондсь:
- Тядязень альнякац Фёдор Тюрькин—хирург. Фёдор Васильевич эряй Сызраньца, коса и работай. Мархтонза эрь васьфтемась, корхнемась салсезе мялезень. Сон ёрась, штоба раднятнень эзда кивок араль врачекс. Иденза тя тевть ашезь кочка, а вов мон арьсезевонь тянь колга.
Школаса оцю класснень эса тонафнемстон путонь инголен цель: сотомс эряфозень медицинать мархта. И нинге. Малавса фельдшеркс лама киза работась крёснавазе (тядязень родной брадонц рьвац) Валентина Тюрькина. Валентина Андреевна пенсияса, но велень эряйхне тянемс азондыхть оцю спасиба седи ваксстонь работанц инкса. Тядязень альнякац тянемс хирург: поликлиникаса и ошень больницяса.
Школать шумордамдонза меле Борис Гагин поступась Н.П.Огарёвонь лемса Мордовскяй государственнай университетонь Медицинскяй институту, мезсь и арась васенце аськолксокс врачекс улемать колга мяльть пяшкодеманцты.
Врачекс тонафнихть пяк ламос. Ня валхне, улема, содафт ламотненди. И синь видет. Борис Борисович кота кизот пуропнесь содамошит «Лечебное дело» специальностть, меле нинге кафта кизот травматологиять и ортопедиять коряс ординатураса. Мес Малавонь мокшень цёрась ашезе кочка хирургиять? Валонзон коряс, травматологонь-ортопедонь тевсь сяда тусь мялезонза.
Сембе ня кизотнень Медицинскяй институтса сон тонафнесь кода практикати, стане и теорияти. Лиякс азомс, синь кемокснесть фкя-фкянь. Ульсть дежурстват Саранск ошень 4№ клиническяй и Республиканскяй больницятнень эса.
Вестевок ашезь каенда, мес кочказе врачень тевть. Меколанкт, кизоста кизос эсонза кемокснесь мяльсь сянь колга, што тиезе эрявиксть.
2021 кизоня июльста получазе дипломть, а сёксенда учезе армияса служамась. Мзярда мрдась Малаву, макссь эстеенза кизефкс: а мес армияв тумозонза аф работамс, пуроптомс опыт, практика? Мольсь Ковылкинскяй центральнай районнай больницянь поликлиникав, коза од специалистть примазь оцю мяльса.
Армияса служась Подмосковьяса. Кода корхнихть оттне, «дембельда» меле мрдась шачема-касома вели, сяс мес ёрась сяда тов поладомс врачень тевонц аф косовок ширеса, а ёмла родинасонза. Поликлиникаса цёрать содазь ни. Ковылкинскяй центральнай районнай больницять главнай врачец Владимир Шукшин, сонь заместителец Валентина Лукьянова васьфтезь Борисонь кода эсь ломанень.
«Владимир Иванович, Валентина Владимировна примамазь пяк лац, мезенкса теест оцю спасиба! Эрь тевса од специалистти эряви ширень кирдема, лезкс васенце аськолксонзон тиемста. А монь мархтон ульсь самай тяфта»,—лятфни Борис Гагин.
Сай кизонь январть ушетксста топоди кафта кизот, кода мокшень цёрась работай поликлиникаса «Земский доктор» программать коряс.
Мзярда теенза азсть тя программать колга, ламос арьсекшнема ашезь карма, согласиндась. Валонзон коряс, сембе условиятне тифт од специалисттненди. «Земский доктор» программать вельде получаф пандомать Борис Борисович сяда тов арьсекшнесы ётафтомс эстеенза эряма вастонь рамамс. Мзярс эряй Ковылкинаса сивотьф квартираса.
Мезьста ушеткшни и кода ётни врачть рабочай шиц? Шарьхкотьф мезьста! Ширезонза приёмс сашендыхнень примамаснон эзда. Поликлиникав синь пшкятькшнихть Ковылкинскяй и Кадошкинскяй райононь сембе велетнень эзда, Ковылкинаста, Кадошкинаста, а нинге—Наровчатста! Кда омбоце врачсь-травматологсь уленди отпускса, омбоцесь шити примси 35 и сяда ламонь ломань. Ётксост шавшиста и пяденцяста ёмла пациенттне—иттне. Экстреннай травма мархтотне примавихть поликлиникав пшкядемдост меле эстокиге, очередьса апак учсек, плановайхне—записьс коре. Тялонда пациенттнень лувкссна кой-мзярошкада касонды курьксть сюнеда прашендоматнень инкса.
Врачсь старандай мумс марстонь кяль лезксонкса эрь сайть мархта. Кда няйсы, што ломанць мокша, азы несколька вал шачема кяльса, пациентсь, мярьгат, эжелгоды, и сяда тёждяста туй пичефти урмать колга корхтамась.
Поликлиникань травматологсь-ортопедсь Борис Гагин пяк шназе коллективть, коса сон работай. Оцю спасиба азсь травматологиянь отделениять заведующаенцты Вадим Потанькинонди. Вадим Владимирович фалу анок лездомс и советса, и тевса. Борис Борисович, мзярда заведующайсь тушенды отпускс, тиендьсыне сонь тевонзон. Тя, кле, лезни козякофтомс опытть. А нинге лама лямбе вал азсь медицинскяй сестрать Алевтина Чернышовать, кона работай мархтонза, лемс. Алевтина Викторовна, кле, омбоце «кядезе».
Азсаськ и сянь, што од врачсь примай участия населенияти васенце лезксть максоманц—тактическяй медицинать коряс пилотнай проектть эряфс ётафтомасонза. Августста тонафнемась ётафтовсь Ковылкинскяй районца, кона тя тевонди кочкафоль васенцекс республикань муниципальнай образованиятнень ёткста. Районца кочкафтольхть тя тонафнемать мархта сотф кота координаторхт. Ётксост и врачсь-травматологсь-ортопедсь Борис Гагин. Сон «КЭМЗ» ПАО-ть коллективонц тонафтозе несчастнай случайхнень, токавоматнень и эряфти и шумбрашити «гразяй» лия случайхнень пингста медицинскяй васенце лезксть максоманцты. Ёткозост сувсихть синневоматне, пря пакарень уень, карязбакарень токавоматне, веронь шудематне и стак тов. Конешна, киньге аш мялец повомс тяфтама прябалас, но кда сон лиссь—улема анококс!
А нинге мокшень цёрась—спортивнай врач Ковылкинскяй районца ётафневи сембе пялькстоматнень эса. А синь улендихть пцтай эрь недяляня.
Ваймосема шитнень ётафнесыне Малавса. Тядянь-алянь кудть лямбоц максси вийхть-эрьгат. Ялгафты спортть мархта.
Кодамкс няйсак эсь пряцень кемоньшка кизода меле? Тя кизефксть лангс врачсь отвечась тяфта: «Ёран улемс козя опыт мархта врачекс и пчкафнемс ломатть».
А минь эсь ширденк арьсетяма мокшень цёрати и сяда тов маштозь вятемс кочкаф эрявикс тевонц! Шумбрашинкса—шумбраши тейть, Борис Борисович!
Татьяна АЛЬШИНА.
Следующая публикация
Комментарии 62
Что б все у него в жизни было хорошо, всех благ ему.
Желаю крепкого здоровья и счастливой жизни хорошему человеку!