Предыдущая публикация
ЭРЬ ПИНГТЬ СОНЦЕНЬ ГЕРОЕНЗА
Мокшень цёрась Роман Матросов кассь Якутияса, а шачемас коре сон Сире Шайгавста. Кафта кизонят ульсь теенза, мзярда тядянза-алянза, Александр Владимирович и Елена Ивановна, ётасть эряма кельме шири. Якутияса Роман тонафнесь школаса, а 9-це класста меле поступась колледжу, коса получазе горнай оборудованиянь слесарень и электрослесарень специальностть.
2020 кизоня Роман Матросов тертьфоль армияв. Пяле киза служась Владивостокса военно-морской флотса, а меле контрактс коре ётась морской пехотав. Кой-мзяра пинге ульсь ученияса Белоруссияса. Тоса сонь и сатозе специальнай военнай операциять ушедомац.
Мокшень цёрась васенцетнень лувксса лиссь укронацисттнень каршес тюрема. Роман ульсь водителькс. Урал машинаса пачфнесь артиллерияти боеприпаст и лия эрявикс паршихть. Пяшкотькшнесь боевой задачат Киевть, Мариупольть ваксса, Донецкяй и Луганскяй направленияса. Кода азозе Роман, теенза савсь ащемс фкя стройса лама национальностень ломань мархта и сембе синь мольсть СВО-в аф кинь-бди кошардоманц, мярьгоманц коряс, а эсь мяльс коре, штоба араламс эсь Родинаснон, семьяснон, синь сетьме эряфснон. Фкяське ашезь пота фталу, ашезь няфте пелема. Сембе кода фкя кемоста мольсть инголи и тиендсть путкс сяськомать маласькофтоманцты.
- Эрь пингть сонцень героенза,—мярьгсь Роман Матросов.—Тяни минь героеньке сят, кит тячи специальнай военнай операциясот, аралакшнесазь Россиять и марнек мирть фашизмать эзда.
СВО-са Роман ульсь несколька ков. Тя пингста мархтон служайхнень мархта, кле, минь араме цебярь ялгакс и нльне брадкс. А сяс и сембода пелькссь фронтса, сонь валонзон коряс, мзярда няйсак ранендафста ваксстот боецть. Эста ни анокат стямс пулятнень алу, аньцек араламс сонь.
- Мзярда улендсь ётка пингоньке, минь азонкшнеме атяньконь, щятяньконь колга, конат араласть шачема-касома масторснон эса Великай Отечественнай войнань кизотнень,—азозе цёрась.—Пяк мяленьколь улемс лацост, штоба пингонь ётазь колганк тяфта жа гордостень марязь лятфнельхть уноконьке.
Тяни Роман Матросов тонаткшни мирнай эряфти. Фронтста сон мрдась Сире Шайгаву.
- Шабакс мон сидеста сашенкшнень вели атянень-бабанень, щятянень-щаванень шири, ётафнине тяса сембе каникулатнень,—азозе боевой действиянь ветеранць.—Пяк мялезон тяса. Сире Шайгавса васьфтине кельгома стирезень Верань. Сон учемань васенда армияста, а меле—СВО-ста. Тяни минь марсотама и арьсекшнетяма свадьбань колга.
Роман лиссь покодема МЧС-у. Тияк поступась тонафнема кооперативнай институту, а стане жа «Синергия» московскяй финансово-промышленнай университету, мезьса теенза лездсь «Защитники Отечества» фондсь.
СВО-нь ветеранць примси участия шабатнень патриотическяйста воспитандамасост. Сидеста васетькшни школаса тонафнихнень мархта, азонкшни теест Родинати кельгомать, эсь службанц, ялганзон-геройхнень колга.
Ольга ЕВДОКИМОВА.
Следующая публикация
Комментарии 65