Предыдущая публикация
❗️Конкурс❗️Конкурс❗️Конкурс❗️
МАЗЫХТЬ МОКШЕНЬ СТИРЕНЬКЕ🍓💖
Кельгома лувиеньке! Арась цебярь койкс газетаньконь лопанянзон лангса ётафнемс мокшень стирьхнень ёткса мазышинь конкурс, конань эса оцю мяль шарфневи конкурсанткать аф аньцек мазышинц, но и национальнай щамонц лангс. «Мазыхть мокшень стиреньке» конкурссь мольфтеви сяда тов. Лятфтасаськ: штоба примамс эсонза участия, редакцияв кучема сёрма, коса азондома эсь колгат, и фотографиятнень, коса щафат-каряфат мокшень щамса. Кда ули мяленте, снимкат можна тифтемс «Мокшень правдать» редакцияса. Кода фалу, конкурсть итогонза азовихть Од кизонь карша, сяськихне казевихть казнеса.
Мазы мокшень стирьхть, оцю мяльса учтядязь тяфтама адресс коре: Саранск ошсь, Советскяй ульцясь, 22№ кудсь, «Мокшень правда» газетать редакцияц (сёрманди почтовай индекссь 430005).
А тяни пара мяльса содафттядязь од участницаньконь мархта. Сон шачсь и кассь Старошайговскяй райононь Сире Теризморга велеса.
Настя КУРКОВАСЬ тонафни Сире Теризморгань школаса, тядде ётась 9-це классу. Тонафнемась макссеви теенза тёждяста, оценканза аньцек «нилет» и «ветет». Кельгома предметоц—математикась. Эсь содамошинзон стирсь сидеста няфнесыне олимпиадатнень пингста, кепотьксонди, биологиять, физикать и, конешна, математикать коряс.
Настять аф кржа кельгома тевдонза. Нинге ёмла класса тонафнемста шарфтсь мяль ёмла ожнаняста кодамати и тячемс пара мяльса занци пря тя кядьтевса. Ожнаняста кодамати героиняньке тонафни Национальнай культурань центрать видеса. Тяса Настять и лия стирнятнень мархта работай машты кядь мокшавась Анна Ивановна Цыганова. Тячиень конкурсантканьке тиенди цифкст, крганят и лама лия национальнай мазоптомбяль.
Кельгсы Настя и рисовандаманц. Кода азозе сонць, тя тевсь ащи теенза сетьмома, седиень озафтома вастокс. Сявсайне, кле, кядезон карандашнень или помаланятнень и юкснян сембе прябалатнень колга. Лияда башка стирсь пяк кельгсы панчфонь и мультфильмаста, ёфксста персонажень рисовандаманц.
А нинге Настя Курковать пяк мазы вайгялец. Аф васенце кизось ни сон морси «Лаймоня» ансамбльса и примси участия лама иласа-мероприятияса. Кепотьксонди, «Шумбрат, Мордовия!» Народнай творческяй республиканскяй фестивальса. А меля «Лаймонясь» няфтезе прянц мянь Чебоксары ошса, коса ётафтовсь идень фольклорнай фестиваль. Сцена лангс ансамблень участницатне фалу лисендихть мокшень мазы щамса. Настяти кельгови национальнай нарядсь. И тя кельгомась, улема, ётась теенза бабанц, Елена Васильевнань эзда. Сиренять мокшень нарядоц аф пулиякшни арзяса-коса, сон сидеста щашендсы сонь иласта или кодамовок пуромксс.
Азома нинге сявок, што тячиень героиняньке кассь трудонь кельги семьяса, сяс сон ёмластокиге апак тонатт стак ащекшнемати. И сяда ёмласта, и тянивок Настя пара мяльса лезни оцюфненди кудъётконь и перень тевса: якай жувататнень мельге, кочкси и валонды панденят.
Эсь колганза стирсь азозе и сянь, што пяк кельгсыне животнайхнень. Кудса сонь ули Шарик пиненяц, конанань сон лувондсы цебярь ялгакс.
Ольга ЕВДОКИМОВА.
Следующая публикация
Комментарии 15