Предыдущая публикация
КЯШАЛОНЬ ЦЁРАСЬ - СВО-нь УЧАСТНИК
Атюрьевскяй райононь Кяшал велесь содаф трудонь кельги ломанензон мархта. Тяста лиссь лама содаф поэтта, политикта, военнай ломаньда, конатнень лемсна содафт аф аньцек мокшэрзянь крайса, но и марнек странаса. Мекольдень кизотнень тяса эряй 300-да лама ломань. Пяледа ламосна пенсионерхт. Кяшалонь цёратне примайхть участия СВО-са. Няфтьсазь эсь пряснон афкуксонь геройкс. Ламотне эздост казьфт боевой орденца и медальса.
Илья Шабайкин шачсь-кассь мокшень оцю и трудонь кельги семьяса. Аляц, Пётр Михайлович—офицер, лама киза покодсь УФСИН-нь системаса. Сяльде ётасть Кяшалу эряма. Трудендась школаса директоркс, вятсь историянь, географиянь урокт. Тяса трудендась и тядяц, Зинаида Яковлевна. Шабайкиттне касфтсть вете итть: фкя стирь и ниле цёрат. Пётр—судебнай пристав, трудендай Атерьса. Александр—УФСИН-нь офицер, покоди Зубово-Полянскяй райононь Сосновка посёлкаса, Наталья Петровна—историянь и обществознаниянь учитель, тонафты итть Кяшал велень средняй общеобразовательнай школаса. Николай—Торбеевань мясомолочнай колледжень студент.
Илья Шабайкин—нилеце шабась семьяса. Кемонь кизот тонафнесь Кяшалонь школаса, меле—Н.П.Огарёвонь лемса Мордовскяй госуниверситетонь довузовскяй факультетса. Мялецоль улемс программистокс. Тонафнесь кафта кизот и тусь армияв служама. Боевой и политическяй подготовкань отличниколь. Сась куду сержантокс 2021 кизоня. А 2022 кизонь 24 сентябрьста сявозь СВО-в. И ся пингста сявомок сон тоса. Инголенза ащи задачатнень пяшкотькшнесыне оцю ответственностень марязь. Казьф аф фкя оцю казнеса.
Ётай кизоть Шабайкиттнень кенкшезост чакась оцю зиян. Кулось Илья Петровичень кельгома тядяц.
Илья Шабайкин кирди кеме соткс семьянц, мала ломанензон мархта.
- Учтама эсонза куду,—корхтай аляц.—Седиеньке палозь-палы инксонза. Но мезевок аф тият, Родинась эряви араламс.
Пётр Михайлович маряй оцю гордость Кяшалонь цёратнень инкса.
Илья ФЁДОРОВ.
Следующая публикация
Комментарии 41