Предыдущая публикация
🔹ABDULHAY OTAXO'JAYEV - bugungi kunda o'zbek dublyaj san'atining eng ko'zga ko'ringan mahoratli vakillaridan biri bo'lib, bugungacha yuzlab filmlar va seriallar dublyajida ishtirok etgan.
U 1978 yilning 5 fevral sanasida Toshkent shahrida tavallud topgan. Toshkent shahar, Olmazor tumanidagi 134 - o'rta maktabni tamomlagan. O'zbekiston Milliy Universitetining Tarix fakultetida tahsil olgan.
Abdulhay Otaxo'jayev oilali, uch nafar farzandi (ikki o'g'il va bir qiz) bor.
Aktyorning hobbisi futbol sport turi bilan shug'ullanish. Muxlislik qiladigan futbol jamoasi - "Barselona".
Abdulhay Otaxo'jayev ilk bor Televideniye sohasiga 2004-yilda kirib keladi. Dastlab O'zbekiston Milliy Teleradiokompaniyasining "Sport" telekanali dublyaj bo'limida o'zining ish faoliyatini boshlagan. U bu yerda rejissyor Jahongir Majidov boshchiligidagi jamoa bilan ishlay boshlaydi va sohaning dastlabki sir-sinoatlarini shu yerda o'rganadi. Keyinchalik faoliyati davomida marhum rejissyorlar Kamoliddin Usmonov, Yo'ldosh Abdukarimov, Matyoqub Orziyevlar bilan ham ishlashga muvaffaq bo'ldi. Uning dublyaj sohasidagi eng asosiy ustozlaridan biri rejissyor Bahodir Qosimovdir.
Dublyaj ustasi ayni paytda O'zbekiston Milliy teleradiokompaniyasining "Kinoteatr" hamda "Dunyo bo'ylab" telekanallari bosh muharriri sifatida ham faoliyat yuritmoqda.
Abdulhay Otaxo'jayev "Muzyurak" (Olaf), "Chaqmoq Makvin" singari multfilmlar shuningdek, "Garri Potter" (Ron), "Uzuklar hukmdori" (Elayja Vud va Gorlum), "Karib dengizi qaroqchilari" (Orlando Blum), "Charli va shokolad fabrikasi" (Jonni Depp obraziga) kabi o'nlab jahon filmlari dublyajida bosh obrazlarni gavdalantirgan.
Abdulhay Otaxo'jayevning Jahon kinosida yoqtirgan aktyorlari Jonni Depp va Xoakin Fennikslar hisoblanadi. Filmlar tomosha qilishda esa uning alohida janriga e'tibor qaratmaydi, yaxshi film bo'lsa bo'lgani u qanday janrda ekanligi ahamiyatli emas deydi dublyaj ustasi.
Abdulhay Otaxo'jayev dublyaj mahsuloti sifatli chiqishi, dublyaj jarayoni maroqli bo'lishi uchun dublyaj paytida atrofdagilar bilan samimiy holatda ishlash muhim ahamiyatga ega ekanligini ta'kidlaydi.
Dublyaj san'atiga qiziquvchi yoshlarga esa - "Maslahatim, bu sohani tezda egallab olaman deb pala-partishliklarga yo'l qo'yishmasin. Bu sohani o'z ustalaridan o'rganishsin. Va albatta eng muhimi sabrli bo'lishsin!" - deydi Abdulhay Otaxo'jayev.
🎧 Telegram.me/dublyaj_qirollari 📺
Следующая публикация
Комментарии 10