Предыдущая публикация
Темур Кападзе Ўзбекистон терма жамоаси бош мураббийи этиб тайинланди.
Ўзбекистон футбол ассоциацияси Темур Кападзе терма жамоа бош мураббийи этиб тайинланганини расман тасдиқлади.
Қайд этилишича, Ўзбекистон футбол ассоциацияси терма жамоа бош мураббийлиги учун бир қатор номзодларни ўрганиб чиққан ва таҳлил қилган. Маҳаллий ва хорижлик тажрибали мутахассислар билан музокаралар ўтказган. Шу билан бирга, мураббийлар кенгаши томонидан тақдим этилган тавсиялар ҳам батафсил кўриб чиқилган.
«Жаҳон чемпионати саралашининг ҳал қилувчи ўйинларига оз вақт қолганини ҳисобга олиб, жамоа ва футболчилар билан яқиндан таниш бўлган, узоқ йиллар давомида терма жамоа сафида тўп сурган ҳамда бош мураббий ва ёрдамчи мураббий сифатида фаолият олиб борган, шунингдек, Ўзбекистон Олимпия жамоаси билан тарихий натижага эришган Темур Кападзе номзоди илгари сурилди. Ҳозирги юзага келган ҳолатда ЎФА айнан Кападзенинг мураббийлик истеъдоди, масъулияти, жамоа аъзолари орасида мавқеи, қолаверса доимо юқори мақсад сари интилиш каби жиҳатлари орқали муҳим учрашуарда ижобий натижа кўрсатишига ишонади», — дейилади ташкилот хабарида.
Таъкидланишича, Темур Кападзе айни кунларда Қатарда йиғин ўтказаётган Ўзбекистон терма жамоасига қўшилиб, жамоа бошқарувини қўлга олади.
Аввалроқ, Ўзбекистон терма жамоаси бош мураббийи Сречко Катанец соғлиғи билан боғлиқ муаммолар сабабли Ўзбекистон футбол ассоциацияси билан тузилган шартномани ўзаро розилик билан бекор қилишга қарор қилган эди.
Эслатиб ўтамиз, 43 ёшли Темур Кападзе 2024-йилда Ўзбекистон олимпия жамоасини футболимиз тарихида илк бор Олимпиадага олиб чиққан ва якунда Ўзбекистонда йилнинг энг яхши мураббийи сифатида эътироф этилганди.
Маълумот учун, Ўзбекистон терма жамоаси 27-январь куни Доҳада Иорданияга қарши ўртоқлик ўйинида майдонга тушади. Бу баҳсга асосан Суперлигада тўп сураётган ўйинчилар жалб этилган.
Терма жамоамиз 20-март куни ЖЧ-2026 саралаши доирасида Қирғизистонни Тошкентда қабул қилса, 25-март куни Теҳронда Эрон терма жамоаси меҳмони бўлади. Ушбу баҳслардаги муҳим очколар жамоамизга илк бор жаҳон чемпионати йўлланмасини келтириши мумкин.
Вакилларимиз ҳозирда 13 очко билан "А" гуруҳида 2-ўринда бормоқда.
Следующая публикация
Комментарии 1