Аслă Вĕрентекенĕмĕр Иван Яковлев чăваш халăхне панă Халалĕнче çырнă çак йĕркесене эпир ача чухнех ăша хывнă.
Кăçал Раççейра ҫемье Çулталăкĕ тата ҫу уйăхĕн 15-мĕшĕнче Пĕтĕм Тĕнчери çемье Кунĕ пулнине тĕпе хурса, ЧНК «Чăваш хĕрарăмĕ»
комитет хастарĕсем шăпах çак кун регион тулашĕнчи чи маттур чăваш хĕрарăмĕсем хушшинче Чĕмпĕр хулинче «Хĕрарăм, сан умăнта таятăп пуçăма» конкурс йĕркелесе ирттертĕмĕр. Комитет пайташĕсене инçе çула пуçтарăнса тухма ЧНК пĕрремĕш вице-президенчĕ, АО «ТУС» тĕп директрĕ Николай Угаслов; парнесемпе вара конгресӑн вице-президенчĕ, ТЯО «ПСК ВЯЗПА» тĕп директрĕ Вязов Павел Николаевич тивĕçтерчĕҫ. Эпир вĕсене чĕререн тав тăватпăр. Ырă ĕçĕн хакĕ пысăк тенĕ халăхра, çапла пултăрччĕ.
Палăртма кăмăллă, Чĕмпĕрти чăвашсен «Ниме»
вырăнти общество организацийӗн
правленийӗн ертӳçи Герман Дмитриевич Мадюков тата пай пуҫлӑхӗ Ираида Гаврилова, унти «Чăваш хĕрарăмĕ» комитет председателĕ Елена Урасметова тата ытти хастарсем пире ăшшăн кĕтсе илчĕç, конкурса ултă маттур хĕрарăм хутшăнасса пĕлтерчĕç. Конкурс председателĕ пулнă май, ытти пайташсемпе - Анатолий Ухтияровпа, Антонина Андреевӑпа, Нина Димитриевӑпа, Валентина Цыпленковӑпа, Ольга Туркайпа, Раиса Сарпипе тата Герман Мадюковпа ăмăртӑва хутшӑнакан хĕрарăмсен пĕрремĕш тупăшăвне – чăваш апачĕ хатĕрлес ăсталăха тишкертĕмĕр. Кашни сĕтел çинче илемлĕ вырнаçтарнă кукăл-çăмах, техӗмлӗ шăрттан тата ытти юр–вар тивĕçлĕ вырăн тупнă. Ял хĕрарăмĕсем чăвашăн кăпăклă сăрине тума ачаран вĕреннине, ăсталăха туптама пултарнине çирĕплетрĕç.
Кашниех, хавхалантаракан ушкăн пулӑшнипе, техĕмлă апат янтӑлама пултарнине кăтартса пачĕ.
«Хампа тата хамăн çемьепе паллаштарни» номинацире ăмăртăва хутшăнакансем таса чăваш чĕлхипе илемлĕ те капăр наци тумĕпе
сцена çине тухса хăйсем çинчен туллин хыпарларĕç. Пурте хăйсен пултарулăхĕпе тӳресене тĕлĕнтерме тăрăшрĕ.
Çемьери йăла-йĕркепе паллаштарни тата наци тумĕн пуххисене кăтартни уйрăмах кăсăклă иртрĕ. Акă, асаннен асамлă арчинчи мулпа та паллашрăмăр, мăнукне ятарлă çар операцинчен тĕрĕс-тĕкел киле çаврăнса килессе чăтăмсăррăн кĕтекен асламăшĕн пехил сăмахĕсене те итлесе хурлантăмăр,Чĕмпĕр тăрăхĕнчи чăваш хĕрарăмĕсен иртнĕ ĕмĕрти тĕрлĕ çулсенчи наци тумĕн коллекцийĕ те кăмăла çĕклерĕ. Уйрăмах Валентина Киргизова (вăл конкурса 4- мĕш номĕрпе хутшăнчĕ) ашшĕпе амăшĕ вĕрентсе каланисем чуна витерчĕç:
"Эпир çемьере улттăн ӳсрĕмĕр. Пурте атте-анне пилĕпе, ăшăлăхра тата юратупа ҫитӗнтӗмӗр. Ача-пăча чух тĕрлӗ лару-тăру сиксе тухать. Пĕррехинче эпир темле сăлтава пула, пĕр-пĕринпе вăрçса кайрăмăр, ах,айванскерсем, пĕрне пĕри çапатпăр, кӳрентеретпĕр, курайман тăшмансем пулса та тăтăмăр.
Атте питĕ лăпкă та ăслă çынччĕ. Анне те йӑваш кăмăллăччĕ.
Вĕсем пире ултсăмăра та пĕр рете тăратрĕç те пĕр-пĕринччен каçару ыйттарчĕç, ыталаса чуп тума хушрĕç. Çав самант пирĕн чĕресене
ĕмĕрлĕх кĕрсе вырнаçрĕ. Аттепе анне те пирĕнтен уйрăлса кайрĕç, анчах та эпир çавăнтанпа пĕр-пĕринпе килĕштерсе пурăнатпăр.
Аттепе анне вĕрентнине тĕпе хурса, ачасене çула кайнă чух та, пысăк ĕç пуçланă чух та пехил паратпăр", - терĕ.
Анне пилĕ ылтăнран та хаклăрах тенĕ ваттисен сăмахĕн вăйĕ тĕлĕнмелле пысăк.
Чĕмпĕр тăрăхĕнчи улах йăлипе паллашма та кăсăклă
пулчĕ.
Конкурс программине самаях пуянлатаканĕ - РФ культурăн тава тивĕçлĕ ĕçченĕ, сăвăç, çыравçă, композитор, куçаруçă Валентина Тарават ертсе пыракан «Шанăç» халăх фольклор ушкăнĕн юррисем, Валентина Николавна хӑй шӑрҫаланӑ сăввисем пулчĕç.
Тупăшу пĕтĕмлетĕвĕпе килĕшӳллĕн, Марина Борисова Чĕмпĕмпĕр тăрăхĕнче пурăнакан чăваш хĕрарăмĕсен чысне юпа уйăхĕнче Чӑваш Республикинчи Çĕмĕрле МО территоринче иртекен пĕтĕмлетӳ конкурсĕнче хӳтĕлеме тивĕçрĕ. Татьяна Капитонова, Валентина Киркизова, Вера Игнатьева, Нина Назарова тата Галина Свистунова тĕрлĕ номинацире çĕнтерсе диплома тата асăнмаллăх парнесене тивĕçрĕç.
Чăваш ен делегацийĕ те, Чĕмпĕрсем те конкурса хутшăнакан чи маттур та пултаруллă, ĕçчен те вашават, хастар та пуçаруллă чăваш хĕрарăмĕсене асăнмаллăх парнесемпе хавхалантарчĕç. Вĕсене ЧНК «Чăваш хĕрарăмĕ» комитет председателĕ Юлия Мареева, Чĕмпĕрти «Ниме"
чăвашсен культура центрĕн
правлени ертӳçи Герман Дмитриевич Мадюков ăшшăн саламларĕç.
Конкурс çӳллĕ шайра иртрĕ, ăмăртуçă хĕрарăмсем
чăваш хĕрарăмĕн ятне çӳлте тытнине, кил ăшшине упрама
пултарнине, чăваш апат-çимĕçне пĕçерессипе тата кăпăклă сăра вӗретессипе ăста пулнине, халăхăмăрăн пуян эткерлĕхне упрассипе хастар ĕçленине туллин кăтартса пачĕç. Конкурса тивĕçлĕ шайра хутшăнас тесе тăрăшнă хĕрарăмсене чĕререн тав тăватпăр. Ăруран ăрăва куçакан ырă йăласене упрассипе малашне те çемьесемпе ĕçлессине тĕп вырăна хурасчĕ. Конкурс программине Артем Соколовпа Екатерина Лашманова
чăннипех те аван йĕркелесе ертсе пычĕç.
Чĕмпĕр тăрăхĕнче пурăнакан сăпайлă чăваш хĕрарăмĕ, сăвăç-композитор Валентина Тарават чӑннипех хисепе тивӗҫлӗ. Унăн пултарулăхĕ таса çăлкуç пек тапса тăрать. Вăйлă та маттур çын кăна чăваш хĕрарăмне мухтаса "Пуçа таяр хĕрарăм умĕнче» юрă хайлама пултарать. Ман шутпа, вăл гимн шайĕнче. Ахальтен-им эпир Чĕмпĕрте Валентина Николаевна ертсе пыракан халăх ансамблĕ юрланине тулли кăмăлпа, пысăк хавхаланупа йышăнтăмăр.
Çавра сĕтел хушшинче ЧНКан тата Чĕмпĕрсен «Чăваш хĕрарăмĕ» комитетсем хушшинчи çыхăнăва çирĕплетсе малашне пĕрле ĕçлесси пирки сӳтсе яврăмăр.
Чăваш енĕн сумлă делегаци йышĕнче «Чăваш хĕрарăмĕ» комитет хастарĕсем Василиса Иванова, Лидия Сарине, Ираида Филимонова, Олег Цыпленковпа Валерий Сатлайкин, Оксана Коракова пулчĕç.
Чăвашлăхшăн уйрăмах тăрăшакан хастарсене ЧНК президенчĕ Валерий Клементьев ячĕпе хисеп хучĕпе чысларăм, ку йышра Чĕмпĕрти «ЧНКА» çамрăксемпе ĕçлекен пай пуçлăхĕ Екатерина Лашманова, наци тумĕн дизайнерĕ, 2019 çулта Шупашкарта иртнĕ конкурс çĕнтерӳçи пулнă Татьяна Серебрякова, Чĕмпĕр хулин администрацинче çемьесемпе ĕçлекен Управленин специалисчĕ Зоя Петрова пулчӗҫ.
Пурне те тав сăмахĕсем калатăп, ырлăх та сывлăх, телей сунатăп. Çемйĕрсенче килĕшӳ хуçалантăр, Иван Яковлевич халалланă пек çемье чысне яланах упрамалла пултăр.
Эпир чăвашсем, чӑннипех чăваш пуласшăн.
Юлия Мареева, Чӑваш Республикин культурăн тава тивĕçлĕ ĕçченĕ.
https://vk.com/video353121141_456239017?list=a7dbd709720d5cdf86
Присоединяйтесь к ОК, чтобы подписаться на группу и комментировать публикации.
Комментарии 3