Кĕрхи вăрманта.
Эп утатăп кĕрхи вăрмана,
Савăнса сăнатăп таврана.
Эх, епле ĕçчен эс, кĕркунне,
Капăрлатнă йывăçсен тумне.
Сар сăрпа сăрланă кĕркунне
Шурă хурăн симĕс тумтирне.
Пилеш çулçи хĕрлĕн курăнать,
Ялкăшать вăл, хĕмленсе çунать.
Вăрманта чăрăш çеç сип-симĕс,
Питĕ килĕшет ăна ку тĕс.
Мĕн чуль тăрăшсан та кĕркунне,
Улăштармĕ чăрăш хăй тумне.
Юман, çăка, ăвăс, вĕренен –
Тумĕсем пурин те тĕрлĕрен.
Пурпĕрех сарă тĕс ытларах,
Кĕркунне ылтăнпа пуянрах.
Вăрманта çӳрерĕм кунĕпе,
Эп килентĕм кĕрхи илемпе.
Эрешлĕ капăр асамлăхра
Хама туйрăм чăн-чăн çăтмахра.
Сӑвӑ авторӗ Клементьева Л.Ф.
#хитре_сӑвӑсем #чăваш_сӑввисем #чăвашсем #чăваш_чĕлхи
Нет комментариев