Предыдущая публикация
ГЬАБ ДУНЯЛАЛДА ГlУМРУ.
⠀
Гlумруялъул къоял киналго гвангъарал, роцlцlарал гьечlогунилан рекlекълъуге. Гьаб дунял гьедин бижун буго Аллагьас. Гьеб буго гьелъул тlабигlат.
Гьаб дунялалда нилъер гlумруялъул аслу ккола къварилъаби, захlмалъаби, ургъелал, хlалбихьиял. Гьаб дунял хlалбихьиязул бакl букlинчlебани, Аллагьасул русулазде ва вализабазде гьаниб гlемерал захlмалъаби рещтlинароан. Адам (гl.с.) гlакъубаялда вукlана гьаб дунял тезегlан. Нухl аварагас (гl.с.) гlемерал соназ жиндирго къавмалъул гlадамазул рахъалдасан гlодобегlанлъи ва хlакъирлъи хlехьезе ккана. Ибрагьим авараг (гl.с.) цlадаве рехун вукlана. Гьединго Тlадегlанав Аллагьас гьесда жиндирго вас къурбан гьавеян амру гьабуна ва гlицlго ахирисеб лахlзаталъ гьеб хlукму нахъ бахъана. Ягlкъуб авараг (гl.с.) жиндирго вас Юсуфихъ гlодана, бадиса канлъи ун беццлъизегlан. Муса аварагасе (гl.с.) фиргlавнил рахъалдасан квекlенал лъугlичlо, гьесул къавмалъул гlадамазги гьесие гlемераб ракlбакъвай гьабуна. Гlиса аварагасул (гl.с.) букlана цlакъ мискинаб яшав. Мухlаммад Аварагасги ﷺ дагьаб камиги къварилъиги гуро хlехьезе ккараб. Нилъеда лъала къурайшияз гьесие гьабурабщинаб заралги квешлъиги. Гьесие гlемерал гlагарал гlадамал камуна, хасго кидаго гьесие квербакъулей йикlарай хирияй чlужу муъминзабазул эбел Хадижат (р.гl.).
Мухlаммад Аварагасул ﷺ киналго лъимал, Фатlимат (р.г1.) хутlизегlан, гьев чlаго вукlаго хвана. Гьаб дунялалъул хlалбихьиял гьесда тlаса къотlичlо, гьес дунял тезегlан.
Гьединал мисалал гlемер рехсезе бегьула. Чан салихlал гlадамал гьаб дунялалда къварилъиялда рукlарал! Чан гlакъуба гьез хlехьезе ккараб, хlакъир гьарун, зулму гьабун, туснахъалде рехарал... Гьаб дунял буго хlалбихьиязул бакl.
Гьаб дунял рекlелъе биччазе, гьелда нилъер ракlал хурхинаризе бегьуларо. Гьаб цlакъ рекlкlаб жо буго. Гьаб дунялалда Расулуллагьас ﷺ муъминчиясул туснахъилан, капурчиясул Алжанилан гlадада гурелъул абун бугеб.
Къварилъабаз квалквал гьабула чиясе гьаб дунялалда ракl бухьинабизе. Гьаб дунялалда къварилъаби-балагьал рукlунарелани, инсанасе гьаб кутакалда цlакъ бокьилаан, Ахиратги кlочон.
Гьаб дунялалда гlумру буго заманалъ нилъее кьураб, хlалбихьиязул ва камиязул бакl...
⠀
НУР-УЛ ИСЛАМ
Следующая публикация
Комментарии 16