Предыдущая публикация
РАКЪИ
⠀
Дуда лъай, ракъи тlарикъаталъул агьлуялъул сипатаздасан ва нафсалде данде гъазават гьабиялъул рукнабаздасан цояб букlин. Гьелъул адабги буго жиндирго гlадат билълъараб жоялдаса катил гlин гlадаб жоялъ гурого мукъсан гьабунгутlи. Дуда лъай, ракъи нур букlин ва гlорцlи цlа букlин. Цlаги сунаро жиндирго бетlергьан вухlичlого. Гlорцlи дунялалъул гlaмалазул кlул бугелъул, ракъиги ахираталъул гlамалазул кlул буго. Тlахьазда бицун буго: Аварагасе ﷺ цо чадил кесекги босун, Патlимат (р.гl.) ячlараб мехалъ, Аварагас ﷺ цlехон буго: «Патlимат (р.гl.) гьаб кесек щиб ?» — абун. Гьелъ абун буго: «Гьеб буго дицаго бежараб панкъ, цин дуе гьелъул бутlа кьечlого, дир ракl хlалхьичlо», — ян. Аварагас ﷺ абуна: «Лъабго къоялдa жаниб дур инсул кlалдибе щвараб тlоцебесеб тlагlам буго гьаб», — абун.
Машаихзабазул цояв ракъиялъул кутакалъ гlодарав мехалъ, гьесда гьикъун буго мун щай гlодулеван. Гьес абун буго: «Дуда лъаларищ, дир вакъиялдаса Тlадегlанав Аллагьасул мурад дун гlоди букlин ?» — абун.
Цоясда бицун буго: «Къоялда жаниб цо нухалъ кваналев чи вуго», — ян. Гьес абун буго: «Гьеб сиддикъиназул кванай буго», — ян. Кlицlул кванани щибха букlунебан гьикъидал, гьес абун буго: «Гьеб муъминзабазул кванай буго», — ян. Лъабцlул кваналев вугилан абидал, гьес абун буго: «Дуца дурго агьлуялда дуего руссун гьабеян абе», — ян.
Мутагlилзабазул цояс абуна: «Абу Гlабдуллагь бину Хафифица (къ.с.) дида амру гьабуна щибаб сордоялъ гьесие кlал биччазе анцlго кишмиш лъеян. Дун гьесда гурхlана, ва дица гьесие цо сордоялъ анцlила щуго кишмиш лъуна. Гьев дихъ валагьана ва гьикъана: «Лъица дуда абураб гьадигlан лъеян?» — абун. Гьес анцlго кишмиш кванана ва хутlараб нахъе тана.
⠀
«Лъикlал тlабигlатазул ах» - абураб тlехьалдаса (гьумер 186).
⠀
➡️ https://t.me/avar_islam
Следующая публикация
Нет комментариев