Предыдущая публикация
Ҳаёт гулзорида юрсам о,
Товонимга санчилди тикан.
Биз одамлар шунақами ё,
Дунё ўзи шунақамикан?!
Бир куни қор бир куни ёмғир,
Тирикчилик тошданда оғир,
Ёки замон келдими охир,
Ёки дунё шунақамикан?!
Деймиз Худо берсин бировга,
Гуноҳимиз урсин бировга,
Қолган куним қурсин бировга,
Дунё ўзи шунақамикан?!
Дўст деганинг душмандан баттар,
Ҳар бир қадамингда минг хатар,
Қайтар дунё дейдилар қайтар,
Дунё ўзи шунақамикан?!
Кўнгли борда йўқ менинг кўнглим,
Осмонларга етгани қўлим,
Яхшига кун ёмонга ўлим,
Дунё ўзи шунақамикан?!
Ерга урса кўкка сапчадик,
Ҳаётданмас яшаб чарчадик,
Эй, одамлар сиз айтганчалик,
Дунё ўзи шунақамикан?!
Кўз ёшларга тўлди саҳролар,
Кўп йиғлайди ҳали Зуҳролар,
Жон деганинг жонингни олар,
Дунё ўзи шунақамикан?!
Следующая публикация
Комментарии 2